झापामा अक्सिजन प्रयोग गर्ने संक्रमितको संख्या शून्य
विर्तामोड । कोरोना संक्रमितहरुको उपचारमा अक्सिजनको प्रयोग घट्दै गएको छ । देशभर अक्सिजन प्रयोग गर्नुपर्ने संक्रमित घटिरहेको बताइएको छ ।
स्वास्थ्य कार्यालय झापाका अनुसार संक्रमितको उपचारमा अक्सिजन प्रयोग गर्नुपर्ने अवस्था घटिरहेको छ । असार १ गते स्वास्थ्य कार्यालय झापाले सार्वजनिक गरेको तथ्याङकमा अक्सिजन प्रयोग गर्ने संक्रमितको संख्या शून्यमा झरेको छ । दोस्रो लहरको शुरुआतमा अक्सिजनको हाहाकार मच्चिएको थियो ।
गत बैशाख ३० गते ३३ जना संक्रमितहरुलाई अक्जिनमा राखिएको थियो । छिमेकी राष्ट्र भारतमा अक्सिजन अभाव भएकै कारण धेरै संक्रमितहरुको ज्यान गएको समाचारहरु सार्वजनिक भएका थिए । सोही बेला देखी नेपालमा अक्सिजनको जोहो गर्न थालिएको थियो ।
एक महिनाको अन्तरालमा अक्सिजन प्रयोग गर्ने संक्रमितहरु घटेको स्वास्थ्य कार्यालय झापाले जनाएको छ । हाल जिल्लाका ८ वटा अस्पतालमा ४१ जना संक्रमितको जेनेरल वेडमा, १६ जना आइसीयूमा, भेन्टिलेटरमा १२ जना, एचडीयूमा ६८ जनाको उपचार भइरहेको छ ।