भक्तपुर । नेपाल मजदुर किसान पार्टीका अध्यक्ष नारायणमान बिजुक्छे ‘रोहित’ नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’माथि सङ्गिन आरोप लगाउनुभएको छ ।

एमसीसीको विरोध गर्दै आउनुभएका प्रचण्डले अन्ततः सहमति जनाएपछि गत आइतबार संसद्बाट पारित भएको थियो । अध्यक्ष बिजुक्छेले यो  घटनालाई तत्कालीन माओवादीको आह्वानमा भएको सशस्त्र द्वन्द्वसँग जोड्नुभएको छ ।

‘युद्धको नाममा १७ हजार मानिसको हत्या आरोप लागेका प्रचण्डमा अन्तर्राष्ट्रिय अदालत जानुपर्ने त्रास’ले एमसीसीमा सहमति जनाएको उहाँले जिकिर गर्नुभयो ।

भक्तपुरको न्हुः पुखु (रानीपोखरी)को मङ्गलवार उद्घाटन गर्नुहुँदै अध्यक्ष बिजुक्छेले प्रचण्डको त्रासकै कारण एमसीसी पास भएको बताउनुभयो । 

जनताको इच्छा विपरीत संसद्ले हतार हतार एमसीसी पास गर्नु दुःखद भएको भन्दै उहाँले त्यसका विरुद्ध पार्टीले देशभर विरोध सभा गरेको बताउनुभयो । एमसीसी नेपाल र नेपालीका लागि घातक हुने उहाँको भनाइ छ ।