बिर्तामोड खानेपानीको निर्वाचनमा कांग्रेस-राप्रपाको भागवण्डा मिलेन
बिर्तामोड । बिर्तामोड साना शहरी खानेपानी तथा सरसफाई उपभोक्ता संस्थाको आसन्न निर्वाचनमा कांग्रेस र राप्रपाबीचको तालमेल अनिश्चित भएको छ । तालमेल अनिश्चित भएपछि आज निर्धारित पत्रकार सम्मेलन समेत रोकिएको थियो ।
बिर्तामोडस्थित वाणिज्य संघको सभाहलमा आयोजना गरिएको पत्रकार सम्मेलन भागभण्डा नमिल्दा रद्द भएको हो । पत्रकारहरु सम्मेलन नहुने बुझेपछि फर्किएका थिए ।
जेठ १५ गते हुने निर्वाचनमा कांग्रेस र राप्रपाले तालमेल गरेर जाने सहमति थियो । तर, भागवण्डामा राप्रपाले चित्त नबुझाएपछि तालमेल रोकिएको छ । दुई दलबीच तालमेल हुँदा राप्रपाले सम्मानजनक सहभागिताको अपेक्षा गरेको थियो, राप्रपा झापाका अध्यक्ष केशव ओझाले भने – साथीहरुले हाम्रो मागमा लचकता देखाउनुभएन । हामी आफ्नो उम्मेदवारी दिएर जान्छौं । उपभोक्ताहरुको बीचमा हाम्रो पनि जाँच हुनेछ ।
राप्रपाले एक पदाधिकारी र तीन सदस्य दावी गरेको बुझिएको छ । तर, राप्रपालाई कुनै पनि हालतमा पदाधिकारी नदिने कांग्रेसको अडानले तालमेल रोकिएको हो । पत्रकार सम्मेलनका लागि तोकिएको समयभन्दा अघि दुई दलका नेताहरुबीच अतिथी सदनमा बैठक बसेको थियो ।