एजेन्सी । स्पेनिस बार्सिलोनाका कप्तान लिओनल मेस्सीमाथि आक्रमण प्रयास भएको छ । स्पेनको इबिजामा एक पार्टीमा सहभागी भएका मेस्सीलाई पार्टी चलिरहेकै बेला अपरिचित व्यक्तिबाट आक्रमण भएको हो ।

अहिले मेस्सीमाथि आक्रमण भएको भिडियो फुटेज सामाजिक सन्जालमा भाइरल भइरहेको छ । यो घटना आइतबारको हो । मेस्सी प्रि–सिजनका लागि बिदा मनाएर बार्सिलोना फर्किएपछि परिवारसहित सो पार्टीमा सहभागी हुन इबिजा पुगेका थिए ।

भिडियोमा मेस्सीमाथि आक्रण प्रयास भएपछि ४–५ जना सुरक्षा गार्डले मेस्सीलाई घेरा हाली सुरक्षा दिएर पार्टी हलबाट निकालेको देख्न देखिन्छ । आक्रमण गर्नेको पहिचान भइसकेको छैन ।
सो घटनाअघि सामाजिक सन्जालमा मेस्सी, स्वारेज, जोर्डी अल्बा, फेब्रीगासको परिवारसहितको सामूहिक तस्बिर बाहिरिएको थियो । घटना त्यसपछिको भएको बताइएको छ ।

मेस्सी अन्तर्राष्ट्रिय ड्युटीपछि बिदा मनाएर ३ दिनअघि मात्रै बार्सिलोना फर्किएका थिए । उनी हालसम्म प्रशिक्षणमा फर्किएका छैनन् ।