बिर्तामोड । कोरोना संक्रमण बढ्दै गएपछि वित्तीय संस्था सञ्चालनको समय परिमार्जन गरिएको छ । झापाको बिर्तामोड क्षेत्रमा सञ्चालित वित्तीय संस्था अब दुई घण्टा मात्र खोल्न पाइने बिर्तामोड नगरपालिकाले जनाएको छ ।

गत हप्तादेखि बिहान १० बजेदेखि २ बजेसम्म सञ्चालन भइरहेका बैंक तथा वित्तीय संस्था अब १० बजेदेखि १२ बजेसम्म मात्र खोल्न पाइने भएको हो । बैंक, सहकारी,मनि ट्रान्सफर र आइएमई लगायतका वित्तीय संस्थाका कारण भीडभाड बढेपछि कडाई गर्न लागेको नगरले जनाएको छ । मंगलबारदेखि सरकारले गरेको निर्णय बाहेकका सवारी बिर्तामोड क्षेत्रमा चलाएको पाइएमा तत्काल कारवाही प्रक्रिया अघि बढाउने बताइएको छ । मंगलवार यसबारे माइकिङ गर्ने र बुधबारबाट पूर्ण कार्यान्वयनमा लैजाने तयारी गरिएको छ ।