बिर्तामोड । बिर्तामोड नगरपालिकाले संघीय र प्रदेश सरकारले सूचिकृत गरेको उधोग व्यवसाय बाहेकका पसल खोल्न नपाइने निर्णय गरेको छ । व्यवसायीले सबै व्यवसाय पूर्ववत रुपमा सञ्चालन गर्न पाउनुपर्ने माग गरेका थिए ।

सरकारले ४३ वटा उधोग व्यवसाय मात्रै सञ्चालनको लागि सूचिकृत गरेको थियो । नगरपालिकाले सबै व्यवसाय खोल्न अहिले नै निर्णय नगरेको नगरले बनाएको समितिका संयोजक राजेन्द्र लिङदेनले जानकारी दिए । उनले ३२ गतेसम्म सरकारको निर्णय पर्खिने बताए ।

यसअघि खोलिएका व्यवसाय बिहान ८ बजेदेखि २ बजेसम्म नियमित सञ्चालन गर्न दिने निर्णय भएको छ । यो निर्णय बिहीबारबाट लागु हुने बताइएको छ । नगरभित्र रहेका बैंक तथा वित्तिय संस्थालाई भने नियमित सञ्चालन दिने निर्णय भएको छ ।

उक्त निर्णय बिर्तामोडका व्यवसायी, वाणिज्य संघका प्रतिनिधि र अगुवा व्यवसायी बिचको छलफलपछि गरिएको हो ।