झापा। देशभर मनसुनी वर्षा हुने क्रमसँगै केही क्षेत्रमा भारी वर्षा हुँदा ठूला तथा साना नदीमा बाढी तीव्र बनेको छ । बाढीले तराईका भूभागमा डुबानले जलमग्न बनाउन थालेको छ । पहाडी तथा मध्यपहाडी क्षेत्रमा बाढी र पहिरोले जनधनको क्षति बढाएको छ ।

विगत २४ घण्टामा कास्कीस्थित वर्षा मापन केन्द्रमा अत्याधिक २५०.९ मिलि मिटर वर्षा भएको छ । अन्य दुई केन्द्रमा २०० मिलिमिटर वर्षा भएको छ । त्यस्तै, दरबाङ स्टेसनमा १५०.६, खुदी बजारमा १४९.४, स्याङ्जामा १४८.६, बर्दघाटमा १५०.८ र बेसीसहरमा १६९.४ मिलिमिटर अत्याधिक वर्षा भएको छ ।

वर्षा बढेसँगै नदीको सतह बढिरहेको छ । सप्तकोसीमा बाढी बढेपछि भारतर्फका ३८ ढोका खोलिएका छन् । कोसीको बाढीले सर्तकता तह पार गर्दै खतराको तहतर्फ बढ्दै गरेको बाढी पूर्वानुमान महाशाखाका जलविज्ञ सुनिल पोखरेलले बताउनुभयो । कोसीको जल सतह शुक्रबार दिउँसो ६.२३ मिटरमाथि पुगेको छ । सात मिटर यसको खतराको तह हो ।

कोसीभन्दा बढि चितवनको नारायणी नदीको बहाव रहेको छ । नारायणी नदीको बाढीले सतर्कताको तह पार गरेर खतरातर्फ अघि बढेको छ । नारायणगढस्थित स्टेसनका अनुसार ११ मीटरको सतर्कता तर पार गरेर ११.१३ मिटरमाथि नारायणीको भेल बगिरहेको छ ।

अबको तीन दिन कन्काई, कोसी, कमला, बाग्मती, नारायणी तथा प्रदेश १ र २ मा बाग्मती, गण्डकी र प्रदेश ५ भइ बग्ने नदीमा उच्च बहाव हुने भएकाले तटीय क्षेत्रमा सतर्कता अपनाउन भनिएको छ ।

कञ्चनपुरको शान्तिपुर बेलौरी, नवलपरसीको डण्डा, परासी बर्दघाट, चितवनको माडी, लमजुङको बेसी सहर क्षेत्रमा भारी वर्षा भएकाले सतर्क रहन एसएमएस पठाइ स्थानीयलाई सुरक्षित रहन भनिएको छ ।

काठमाडौँ उपत्यका पनि रातभर परेको पानीका कारण सडक र केही वस्ती जलमग्न बनेको थियो । उपत्यकाका बाग्मती, विष्णुमती, मनोहरा लगातका नदी तथा साना खोलामा बहाव बढेपछि सहरका ढल निकासमा समस्या आएको थियो ।

मौसम पूर्वानुमान महाशाखाले न्यूनचापीय रेखा तराई भूभागनजिक नै रहेकाले साताव्यापी वर्षा कायमै रहने जनाएको छ । आगामी तीन दिन देशभर बदली रही विभिन्न क्षेत्रमा भारी वर्षा हुने उसले जनाएको छ । जस अनुसार प्रदेश १, प्रदेश २, बाग्मती प्रदेश, प्रदेश ५, सुदुरपश्चिम र कर्णाली प्रदेशका केही स्थानमा भारी वर्षा हुने पूर्वानुमान गरिएको छ ।