काठमाडौं -जनता समाजवादी पार्टीका संघीय परिषद अध्यक्ष बाबुराम भट्टराईले नेकपा माओवादीका अध्यक्ष प्रचण्डलाई भित्र खाओवादी र बाहिर माओवादीको संज्ञा दिनुभएको छ ।

एमसीसीका विषयमा प्रचण्डले प्रधानमन्त्री शेरबहादुर देउवासँग मिलेर पठाएको पत्र सावर्जनिक भएपछि गए राती ट्विटरमा लेख्दै भट्टराईले प्रचण्डको नाम नलिइ कडा ढंगले विरोध गर्नुभएको छ । ‘भित्रभित्र राष्ट्रघात,बाहिर बाहिर राष्ट्रवाद’ भट्टराईले लेख्नुभएको छ ‘माछा देखे भित्र हात,सर्प देखे बाहिर हात ।’ प्रचण्डलाई सांकेतिक रुपमा विभिन्न उपमा दिंदै भट्टराईले भित्र खाओवादी र बाहिर माओवादी भएको आरोप पनि लगाउनुभएको छ ।

नेपाली राजनीतिमा जबसम्म यो पाखण्डी र दुई जीब्रे प्रवृतिबाट मुक्त हुदैन तबसम्म देश बन्दै नबन्ने भट्टराईको निष्कर्ष छ । एमसीसीलाई गीजोलिरहे गम्भिर परिणाम आउने चेतवानी भट्टराईको छ ।