– प्रदीप परियार

बिर्तामोड । झापाको बिर्तामोड नगरपालिका क्षेत्रभित्र चोरीका घटना दिनहु बढिरहेको छ । केहि समययता बिर्तामोडका व्यापारीहरुलाई चोरले हदैसम्म दुख दिइरहेका छन् ।

शनिवार विहान बिर्ताबजार प्रहरी चौकी नजिकै रहेको खनाल स्टोरबाट ८ वटा ग्यास सिलिण्डर चोरी भएको छ । विहान ३ः४२ देखि ४ः२० सम्मको समयमा ८ वटा ग्याससहितको मेची र पाथीभरा कम्पनीका सिलिण्डर चोरी भएको सञ्चालक श्री खनालले जानकारी दिए । उनका अनुसार सीसी क्यामेरामा दुई जना व्यक्ति देखिएका छन् । खनाल स्टोर नजिकै अटोमा ग्यास सिलिण्डर राखेर लगेको क्यामेराबाट देखिएको उनले जानकारी दिए । ग्यास सिलिण्डर चोरी भएको घटना बारे इप्रका अनारमनीमा उजुरी गरिएको छ । चोरीमा संलग्नहरुले सेतो वस्त्र लगाएको क्यामेरामा कैद भएको छ ।
यस्तै, दृष्टि आँखा अगाडि रहेको पसलबाट पनि सिलिण्डर चोरी भएको थियो । सुमन राजवंशीको पसलबाट सिलिण्डर चोरी भएको बताइएको छ ।

बिर्तामोडको पुरानो भद्रपुर रोडमा रहेको लक्ष्मी नारायण स्टोरबाट असार १४ गते १० वटा सिलिण्डर चोरी भयो । सञ्चालक खगेन्द्र चापागाईको स्टोरबाट फलामे साङ्ली काटेर ग्यास लगिएको थियो । ११ बजे पछि रातीको समयमा अटोमा राखेर ग्यास सिलिण्डर लगिएको क्यामेरामा कैद भएको छ । उनले प्रहरी चनाखो भए चोरीको घटना न्यूनिकरण हुने बताएका छन् । प्रहरीले ९ बजेपछि पसल बन्द गराउन साइरन बजाउछ, त्यसपछिको काम सकियो जस्तो गर्न हुदैन, उनले भने – राती प्रभावकारी गस्ति गर्नुपर्छ । उनले पनि प्रहरीमा चोरी कार्यमा संलग्नहरुको खोजी गरि कारबाही गर्न प्रहरीमा उजुरी दिएका छन् ।

एक महिनाअघि शनिश्चरे रोडमा रहेको विष्णुलक्ष्मी इन्टरप्राइजेजबाट ६ वटा सिलिण्डर चोरी भयो । कोशी कम्पनीको ग्यास त्यसैगरी फलामे साङ्लो काटेर चोरी भएको चापागाईले जानकारी दिए । ग्यास भरिएका सिलिण्डर श्रृङखलावद्ध रुपमा चोरी भइरहेको व्यवसायीहरुले जानकारी दिएका छन् ।

बिर्तामोडका पुराना ग्यास व्यवसायी देवेन्द्र आचार्यले ४-५ महिनादेखि बिर्तामोड क्षेत्रमा ग्यास सिलिण्डर चोरी भइरहेको बताउँछन् । उनका अनुसार यहाँ चोरी गरिएका ग्यास अन्यत्र लगेर विक्री गर्ने संभावना धेरै छ । कञ्चनजंगा बोर्डिङ , मातामन्दिर क्षेत्रबाट पनि ग्यास सिलिण्डर चोरी भएका छन् । उनले कोहि कसैले ग्यास विक्री गर्दै आएमा प्रहरीलाई खवर गर्न आग्रह समेत गरेका छन् । चोरीका घटना भएपछि प्रहरीमा निवेदन दिने काम भइरहेको आचार्यको भनाई छ । उनले भने – प्रमाण नभेटिए पछि प्रहरीले पनि केहि गर्न सकिरहेको छैन ।

बिर्तामोड–५ का वडाध्यक्ष रोहित प्रसाईले ढलको ढकन पनि चोरी भइरहेको जानकारी दिए । बिर्तामोडको कृष्ण हल क्षेत्रको ३ वटा र बुधबारे बजार, कृषिथोक आसपासबाट ५ वटा फलामे ढकन चोरी भएको बताए । उनले ढकन उक्काइएको ठाउँमा राती सवारी दुर्घटना हुन सक्ने भएकाले रड लगाइएको बताए । ‘ढकन खोलेर चोरी गर्ने काम भइरहेको छ, उक्त स्थानहरुमा दुर्घटनाको जोखिम पनि छ’ प्रसाईले भने – फलामको ढकन विक्रीका लागि खोलिएको हुन सक्छ । त्यसको पहिचानका लागि प्रहरीलाई खवर गरिएको छ ।

बिर्तामोडका डिएसपी सुरज कार्कीले सिलिण्डर चोरीमा संलग्न भएको आशंका तीन जना युवालाई नियन्त्रणमा लिएको जानकारी दिए । उनीहरुलाई अतिथी सदन रोड क्षेत्रबाट सिलिण्डर बोकेर विक्रीका हिड्दै गर्दा नियन्त्रणमा लिएको बताए । व्यापारीबाट खवर आएपछि प्रहरीले उनीहरुलाई सिलिण्डरसहित नियन्त्रणमा लिएको छ । डिएसपी कार्कीका अनुसार तीन युवालाई सोधपुछको काम भइरहेको छ । सबै पसलको ग्यास चोरीमा संलग्नहरुको खोजी कार्य जारी रहेको उनले बताए ।