सम्पादकीय

झापाको बिर्तामोडमा ०७४ साल कार्तिकमा प्रहरीको गोली लागेर घाइते मणि नेपाली अहिले गाउँ शहरका पसलहरुमा पैसा माग्दै गरेको अवस्थामा भेटिन थालेका छन् । पैसा माग्ने उनको बाध्यता हो । प्रहरीको गोली लागेपछि दैनिक मजदुरी गरेर जीवन चलाउने नेपाली पैसा मागेर गुजारा चलाउने ठाउँमा पुगेका छन् । गुजारा चलाउन श्रीमतीले गर्ने मजदुरीले पुग्न सक्छ । उपचारका लागि पैसा माग्नै पर्ने बाध्यता नेपालीलाई आइलागेको छ । बिर्तामोडमा लक्ष्मण शिवाकोटी काण्डमा प्रहरीको गोली लागेर घाइते नेपाली अहिले विहान बेलुकाको छाक टार्न र उपचारका लागि माग्दै हिडेको भेटिन्छन् ।

प्रहरीको गोली लागेर उनको देब्रे हात चल्दैन । कोखबाट छिरेको गोलीले उनको पेट समेतको अवस्था दर्दनाक छ । नेपाली अहिले पेट अढ्याउन कपडाको पेटीको सहारा लिदै सहयोग माग्न हिडिरहेका छन् । हातमा स्टिल लगाइएको छ । स्टिल बाहिरबाटै देखिन्छ । हातमा पिप बगेको देखिन्छ । पेट पनि अढ्याउनुपर्ने अवस्था छ । केही दिनअघि उनको बारेमा हामीले समाचार प्रकाशन गरेका छौं । त्यसपछि सहयोग पनि जुट्न थालेको छ । केही रकम तत्कालै बुझाउनका लागि तयारी भइरहेकाले सहयोग गर्न इच्छुक महानुभावलाई स्वेच्छिक सहयोग गर्न नेपालीको आग्रह पनि छ ।

गोली चलेको दिन उनी काम गरेर खाना खानका लागि जाँदै थिए । सँगै गएका साथी प्रहरीको गोली लागेर ढले । ढलेका साथी फेरि उठेनन् । उनलाई पनि प्रहरीले मरिसकेको भन्दै पोष्टमार्टमका लागि लगिसकेका थिए । तर, नेपालीले हात चलाएको देखेर उपचारका लागि लगिएको थियो । गरिव विपन्न परिवारका नेपालीलाई अहिले उपचारका लागि सहयोगको खाँचो छ । उपचार नपाएमा उनको पेट र हातको अवस्था थप समस्याग्रस्त हुनेछ । यसैले विभिन्न क्षेत्रमा सहयोगी दाताका रुपमा स्थापित व्यक्तिहरुले उपचारमा सहयोग गरौं । सहयोगका लागि धनभन्दा पनि भावना चाहिन्छ । एउटा गोली लागेर पनि बाँचेको मान्छेलाई माग्दै हिड्नुपर्ने बाध्यता नबनाऔं । सबैले सहयोग गरौं, उपचार सफल बनाऔं ।