बिर्तामोड । हत्यापछि शव गाढेको हुन सक्ने आशंकाले झापाको बाह्रदशी– ६ मा प्रहरीले आज जेसिवी प्रयोग गरिरहेको छ । स्थानीय २१ वर्षीय राजेश हजामको हत्यापछि शव गाढेको हुन सक्ने आशंकाले प्रहरीले आज पनि आगनको भागमा खन्ने काम गरिरहेको छ । हिजो घरेलु सामग्रीले शव खोज्न खनिएको थियो भने आज जेसिवी नै प्रयोग गरिएको छ ।

हिजो राती ८ बजेसम्म घरभित्र खनेर शव खोजिएको थियो । आज पनि प्रहरीले गाउँपालिकाको जेसिवी प्रयोग गरेर शव खोजिरहेको छ । आज साढे ४ बजेसम्म शव भेटिएको थिएन ।

प्रहरीले शव खोज्न घरभित्र जेसिवी प्रयोग गर्न हजामका आफन्तले आग्रह गरिरहेका छन् । प्रहरीले घर बाहिर मात्र जेसिवी प्रयोग गरेको भन्दै आक्रोसित आफन्तहरुले आफै घर भत्काएर शव निकाल्ने बताइरहेका छन् । घरभित्र शवको गन्हाइरहेको परिवारको दावी छ ।

गत जेठ १५ गतेदेखि हराइरहेका हजामलाई स्थानीय नरेश राजवंशी, समिर राजवंशी र मुना राजवंशीले हत्या गरेको स्वीकार गरेका छन् । उनीसँगै प्रहरीले उनको भाउजुलाई पनि पक्राउ गरिसकेको बिर्तामोड प्रहरीले जनाएको छ । जेठ १५ गते राती एउटा फोन आयो, परिवार भन्छन्, फोन आए लगत्तै साइकल लिएर हिडेका राजेश फर्किएनन् ।