झापा गापाका ४१२ जनालाई अपाङ्गता पहिचान परिचयपत्र वितरण
झापा । झापा गाउँपालिकामा अपांगता भएका व्यक्तिहरुको स्वास्थ्य परीक्षण, आवश्यक पहिचान तथा परिचयपत्र वितरण शिविर आज सम्पन्न भएको छ ।
झापा गाउँपालिका, प्रदेश सरकार र करूणा फाउन्डेसनको त्रिपक्षीय लागत साझेदारी र राष्ट्रिय अपाङ्ग महासंघको प्राविधिक सहयोगमा सञ्चालित अपाङ्गता रोकथाम तथा पुनस्र्थापना कार्यक्रम अन्तर्गत गरिएको शिविरमा ४१२ जना नयाँ तथा पुरानालाई अपांगता कार्ड वितरण गरिएको गाउँपालिका कार्यवाहक अध्यक्ष अन्जुदेवी थपलियाले जानकारी दिनुभयो ।
गाउँपालिकाको ७ वटा वडामा मङ्सिर २५ गतेदेखि शुरु शिविर आजसम्म संचालन भएको थियोे भने शिविरमा ७२९ जनाले सेवा लिएका थिए ।
सात दिनसम्म संचालन भएको शिविरमा पुर्ण अशक्त अपांगता कार्ड (रातो) ११४ जनालाई , अति अशक्त अपांगता (निलो) कार्ड २२१ जनालाई , मध्यम अशक्त अपांगता (पहेँलो) कार्ड ५९ जनालाई र सामान्य अशक्त अपांगता (सेतो) कार्ड १८ जनालाई चेकजाँच गरि शिविर स्थलमै वितरण गरिएको प्रमुख प्रशासकीय अधिकृत गजेन्द्र थपलियाले जानकारी दिनुभयो ।
उहाँका अनुसार शिविरमा ३६६ जना पुरुष र २६३ जना महिलाहरुले शिविरमा परिक्षण गराएका थिए भने नयाँ ९० जना अपांगता भएका व्यक्तिलाई कार्ड वितरण गरिएको थियोे । कार्यक्रममा आँखा सम्बन्धी नाक कान र घाटी सम्बन्धी, फिजियो थेरापी र मानसिक अपांगता भएका झापा गाउँबासीले सेवा लिएका थिए ।
कार्यक्रममा झापा गाउँपालिका कार्यवाहक अध्यक्ष अन्जुदेवी थपलिया, प्रमुख प्रशासकीय अधिकृत गजेन्द्र थपलिया सातै वटा वडाका वडाध्यक्षसहित जनप्रतिनिधिहरु, करूणा फाउन्डेसनका प्रतिनिधि, गाउँपालिका कर्मचारी, सम्बन्धित बिज्ञहरुको टोली लगायत सञ्चारकर्मीहरुको साथ र सहयोगमा शिविर उपलब्धि मुलक रूपमा सम्पन्न भएको सूचना प्रविधि अधिकृत गौरव सङ्गौलाले जानकारी दिए ।