बैशाख २०, २०८२ शनिबार

भद्रपुरमा बाली उपचार शिविर सञ्चालन

भद्रपुर- भद्रपुर नगरपालिकाले नगरका आठ वडामा बाली उपचार शिविर सञ्चालन गरेको छ । हालसम्म वडा नं १ र २ मा शिविर सम्पन्न भई बाँकी वडा नं ३, ४, ६, ७, ९ र १० मा क्रमशः सञ्चालन गरिने कृषि विकास शाखाका अधिकृत सुमन विमलीले जानकारी दिनुभयो ।

शिविरमार्फत कृषि प्राविधिकहरुको टोलीले कृषकको खैतमै पुगेर बालीमा देखिएका कीरा र रोगको पहिचान गरी उपचार विधिबारे जानकारी दिने गरिएको कृषि अधिकृत विमलीले बताउनुभयो । शिविर सञ्चालनका क्रममा मकैमा फौजी कीरा, लहरे बालीमा औसा, खुर्सानीमा थ्रिप्स र चियामा रेड स्पाइडर माइटजस्ता कीराको प्रकोप देखिएको कृषि विकास शाखाले जनाएको छ ।

शिविरमा सहभागी किसानले कार्यक्रम निकै उपयोगी रहेको बताउँदै खुसी व्यक्त गरेका छन् । प्राविधिक टोली आफँै प्रत्यक्ष आएर बालीमा देखिएको समस्या पत्ता लगाई उपचार विधि समेत बताएर जानुभयो, साथै उपचार कसरी गर्ने भन्ने विषयमा सहज भएको भद्रपुर नगरपालिका–२ का किसान बलबहादुर कटुवालले बताउनुभयो ।

जैविक विषादीको प्रवद्र्धन गर्दै आएको नगरपालिकाले शिविरमा किसानलाई निःशुल्क विषादी समेत वितरण गरेको कृषि विकास अधिकृत विमलीले बताउनुभयो । पालिकाले रसायनिक विषादीको साटो वातावरणमैत्री जैविक विषादी प्रयोगमा ल्याउन किसानलाई प्रेरित गरिरहेको उहाँको भनाइ छ ।

कृषिमा आधारित नगरको समृद्धिका लागि यस्ता व्यवहारिक र प्राविधिक कार्यक्रमलाई निरन्तरता दिइने नगर प्रमुख गणेश पोखरेलले बताउनुभयो । बाली शिविरले किसानको आत्मबल, सीप र आम्दानी बढ्ने नगर प्रमुख पोखरेलको भनाइ छ ।

प्रकाशित मिति : बैशाख १७, २०८२ बुधबार  १२ : ४४ बजे

प्रतिक्रिया दिनुहोस्

इजलास मिडिया प्रा.लि द्वारा संचालित

कार्यालय सम्पर्क - बिर्तामोड ४,झापा
सूचना बिभाग दर्ता नं. : ३९९२- २०७९/०८०
सम्पर्क : ९८५२६४५०२८
ईमेल : [email protected]