बाजुरा । यहाँ कोभिड-१९ रोकथामका लागि अनिश्चितकालिन लकडाउनको घोषणा गरिएको छ । जिल्ला प्रशासन कार्यालय बाजुराले गएराति १२ बजेबाट लकडाउन लागु गरेको हो ।

गृहमन्त्रालयको निर्देशन अनुसार लकडाउन जारी गरीएको जिल्ला प्रशासन कार्यालयले जनाएको छ । भारतका विभिन्न ठाउँमा कोरोना सङ्क्रमण फैलिएको र नेपालमा पनि जोखिम बढ्ने सम्भावना भएकाले लकडाउन लगाइएको प्रमुख जिल्ला अधिकारी कृष्ण गैरेले बताए ।

जिल्ला कोभिड १९ सङ्कट व्यवस्थापन केन्द्रको बैठकको निर्णय समेतको आधारमा रही स्थानीय प्रशासन ऐन २०२८ को दफा ६ को उपदफा सङ्क्रमण रोग ऐन २०२० दफा २ ले दिएको अधिकार समेत प्रयोग गरी निषेधाज्ञा जारी गरीएको गैह्रेले जनाए ।

प्रशासनले होली पर्व पनि घरमै बसेर मनाउन जिल्लावासीलाई निर्देशन दिएको छ । आदेशकोअवज्ञा गरेको पाइएमा सङ्क्रमण रोग ऐन २०२० को अनुसार कानुनी कारबाही गरीने उनले जनाए ।