झापा, ११ मङ्सिर । झापा जिल्ला समन्वय समितिका प्रमुख एवम् दलित समुदायका योद्धा सोमनाथ पोर्तेलले नेकपा एमालेको केन्द्रीय सदस्य पदमा उम्मेद्वार बन्ने घोषणा गरेका छन् ।

चितवनको सौराहाबाटै उनले पार्टीको दशौं महाधिवेशनमा केन्द्रीय सदस्यको उम्मेद्वारी घोषणा गरेका हुन् ।

२०५५ सालमा पार्टी सदस्यता लिएका उनी हाल प्रदेश कमिटी सदस्य र मुक्ति समाज नेपालका प्रदेश नं. १ संयोजक रहेका छन् ।

अनेरास्ववियूबाट राजनीतिमा प्रवेश गरेका उनी नेकपा एमालेबाट झापा जिल्ला समन्वय समिति प्रमुख निर्वाचित भएका हुन् ।

लामो समय जिल्ला र प्रदेशमा बसेर पार्टीमा काम गरिसकेको अनुभवका आधारमा अब केन्द्रीय समितिमा बसेर योगदान दिने उनले इच्छा व्यक्त गरेका छन् ।