काठमाण्डाै – निजी डेरी उद्याेगहरूले दूधको मूल्यमा प्रतिलिटर १० रुपैयाँले बढाउने भएका छन् । निजी क्षेत्रका दूध बिक्री गर्ने उद्योग अर्थात् डेरीहरूको सङ्गठन नेपाल डेरी एसोसिएशन र डेरी उद्योग सङ्घले आज शुक्रवार संयुक्त विज्ञप्ति निकालेर दूधको मूल्य प्रतिलिटर १० रुपैयाँले बढाउने जानकारी गराएका हुन् ।

अब दूधको मूल्य प्रतिलिटर ८६ रुपैयाँ पुगेको छ । यसअघि स्ट्यान्डर्ड प्रशोधित दूधको बजार मूल्य प्रतिलिटर ७६ रुपैयाँ र आधा लिटरको मूल्य ३८ रुपैयाँ थियो । अब आधा लिटर रहेको एक प्याकेट दूधको मूल्य ४३ रुपैयाँ कायम भएको विज्ञप्तिमा उल्लेख छ ।

यसअघि सरकारले कच्चा दूधको मूल्य प्रतिलिटर ६ रुपैयाँ ५२ पैसा बढाउने निर्णय गरेको थियो । सरकारी स्वमित्वको डीडीसीले लिटरमा नौ रुपैयाँ बढाउने निर्णय गरेको छ । तर डीडीसीले बढाएको दूधको मूल्य स्वीकार्न नसकेर नयाँ मूल्य घोषणा गरेको विज्ञप्तिमा उल्लेख छ ।