विराटनगर । पटक–पटक प्रयास भए पनि नाममा सहमती नजुटेको एक नंम्बर प्रदेशको प्रमुख प्रतिपक्षी दल नेकपा एमालेले आफ्नो पार्टी भित्र नाममा सहमती कायम गरेर अरु पार्टीलाई सहमति गराउने प्रयास थालेको छ ।

बिहीवार बसेको प्रदेश संसदीय दलको बैठकले पार्टीका स्थायी कमिटी सदस्य एवं पूर्वमन्त्री हिक्मत कार्कीको संयोजकत्वमा पाँच सदस्यीय समिति बनाएर नाममा सहमती जुटाउने प्रयास थालेको हो ।

दलका नेता भीम आचार्यले कार्की संयोजक रहेको पाँच सदस्यीय समितीको प्रस्ताव गरेका थिए । समितिका अरु सदस्यमा केन्द्रीय सदस्य एवं प्रदेशसभासद्धहरु जीवन घिमिरे,उषाकला राई,जगदिश प्रसाद कुसियत र अनुशासन आयोग अर्जुन राई रहेका छन् ।

समितिका सदस्य जीवन घिमिरेका अनुसार चालु संसदको अधिवेशनबाटै नामको टुंगो लाउने गरी समितिले काम गर्नेछ । जसका लागि आजैबाट काम थाल्ने घिमिरेले बताए । ‘विहान हामी एमालेको बैठक बस्छौं । त्यहाँ एउटा धारणा बनाउछौं । अपरान्ह सर्वदलीय बैठक बोलाउछौं’ घिमिरेले भने, ‘सबैबाट साझा प्रस्ताव आए सहमति भइहाल्यो नभए आएका प्रस्तावलाई टेवल गरेर मतदानको माध्यमबाट यसै अधिवेशनमा नामको टुंगो लगाउछौं । त्यो कामको नेतृत्व एमालेले गर्छ ।’