सम्पादकीय
झापाको बिर्तामाड –५ मा रहेको बुधबारे हटियाका व्यापारीलाई विजुलीको मिटर जडान गरिदिनुपर्ने माग राख्दै बिर्तामोड वाणिज्य संघको नाममा भइरहेको आन्दोलनमाथि चौतर्फी प्रश्न उठेको छ । व्यवसायीको हित गर्ने सवालमा सबै सकारात्मक देखिए पनि संघका केहि व्यक्ति खुलेयाम स्वार्थ पुरा गर्ने उद्देश्यका साथ लागेको स्पष्ट छ । वाणिज्य संघका बरिष्ठ उपाध्यक्ष राजु न्यौपानेले सोही आन्दोलनका क्रममा बिर्तामोडको नगर प्रमुख पवित्रा महतारा प्रसाईमाथि दुव्र्यवहार गरे । उनले नगरप्रमुखलाई दुव्र्यवहार गरे भने नेकपा एमालेका अध्यक्ष सुवास भट्टराईमाथि हातपातको प्रयास गरे ।

शान्तिपूर्ण आन्दोलन सफल हुन्छ । असल नियतका साथ शुरु गरिएका आन्दोलनमा सौहार्दता हुन्छ । एकआपसमा छलफल र बहस हुन्छ । तर, वाणिज्य संघको नाम जोडेर गरिएको आन्दोलन नगरप्रमुख र दलका नेताहरुमाथि कुटपिट मै उत्रिएर गरिएका हर्कतले आन्दोलनलाई सफलतातिर लैजान सक्दैन । सबैभन्दा पहिले आन्दोलनमा सहभागी नेतृत्वकर्तामा आचरण र नियत सफा हुनुपर्छ । वाणिज्य संघका नाममा आन्दोलन गर्नेहरुको नियतमा शंका देखिन्छ । सार्वजनिक जग्गामा बसेका व्यापारीमाथि नगर सरकारका तर्फबाट आवश्यक सहयोग र समन्वय भइरहेको छ । वाणिज्य संघको अरनखटन जायज पनि छैन । यो आन्दोलन वाणिज्य संघको आधिकारिक आन्दोलन पनि नभएको स्पष्ट छ । केहि व्यक्तिको स्वार्थमा आन्दोलन शुरु गरिएको छ ।

बुधबारे हटियाभित्र समस्या असामान्य छ । जसको निराकरण गर्ने दम वाणिज्य संघसँग पक्कै छैन । बुधबारे हटियामा अनाधिकृत रुपमा टहरा बनाएर बस्ने छुट कसैलाई छैन । राज्यको सम्पत्तिमा आफुखुशी गर्नेहरुलाई वाणिज्य संघले हटाउन सक्छ ? बुधबारे हटियाको जग्गामा भइरहेको अतिक्रमण वाणिज्य संघले रोक्न सक्छ ? कृषिथोक र बुधबारे हटियाभित्र आम उपभोक्ता ठगिएको छन्, रोक्न सक्छ ? त्यसको नियन्त्रण गर्न सक्छ ? अहिले महंगीको मार भोग्नुपरेको बेला वाणिज्य संघले मिटरको मुद्दा बोक्ने हो ? त्यो हटियालाई तत्काल भत्काएर डीपीआर तयार गरेर व्यवस्थित कम्प्लेक्स निर्माण गरिनुपर्छ । संघले एउटा मिटर होइन, भव्य कम्प्लेक्स बनाउन नगरसँग पहल गर्नुपर्छ । दिउँसो व्यापार गर्ने बजारमा मिटरको माग जायज पनि देखिदैन ।