बिर्तामोड । नेकपा एमालेका अध्यक्ष एवं पूर्व प्रधानमन्त्री केपी शर्मा ओली भोलि गृह जिल्ला झापा आउने भएका छन् । बडादशैं, शुभदिपावली र छठको अवसरमा आयोजित शुभकामना आदानप्रदान कार्यक्रमा सहभागी हुन झापा आउने भएका हुन् ।

नेकपा एमाले झापाका सचिव शिव ढुङ्गेलका अनुसार हरेक वर्ष झैं यो वर्ष पनि शुभकामना आदान प्रदान कार्यक्रमको आयोजना गरिएको हो । बिर्तामोडस्थित सिटी सेन्टरमा आयोजित शुभकामना आदानप्रदान कार्यक्रममा सबै दलहरु, पार्टीका कार्यकर्ता, शुभचिन्तक र सर्वसाधारण नागरिकहरुलाई निमन्त्रणा गरिएको ढुङगेलले जानकारी दिए ।

यस्तै, अध्यक्ष केपी शर्मा ओलीले यसपटकको विजया दशमीको टीका नलगाउने भएका छन् । ठूलीआमाको यसैवर्ष निधन भएकाले अध्यक्ष ओली परिवारमा टीका नहुने सचिवालयले जनाएको छ ।

आफूले टीका नलगाउने भएपछि उनले कार्यकर्तालाई पनि नलगाइदिने भएका छन् । अध्यक्ष ओली झापाबाट नवमीको दिन काठमाडौं फर्किने सचिवालयले जनाएको छ ।