सामाजिक काम गर्न बचत संकलन गर्दै ढुवानी व्यवसायी खत्री
बिर्तामोड । झापा बिर्तामोडका ढुवानी व्यवसायी निर्मल खत्रीले सामाजिक कार्यको लागि बचत संकलन गरिरहेका छन् । त्यसका लागि बाकस राखेका छन् ।
वडा नं. ५ शितल मार्केटस्थित भृकुटी रोडमा कार्यालय रहेको पूर्वेली ढुवानी सेवा प्रालिका सञ्चालक खत्रीले बिगत १५ दिनदेखि बचत संकलन सुरु गरेका हुन् । बाकसमा कर्मचारीहरुले आफ्नो दैनिक खर्चबाट थोरै भए पनि सामाजिक कार्यमा रकम जम्मा गर्ने गरेका छन् । बाकसमा दैनिक १ हजार रुपैयाँ बचत हुंदै आएको छ ।
रकम संकलन हुँदै आएको बाकस आगामी दशैं अगाडी खोलिने खत्रीले जानकारी दिए । उनले त्यस बेलासम्म कम्तिमा ४ लाख रुपैयाँ संकलन गरिने र त्यो रकम सामाजिक कार्यमा खर्च गरिने बताए ।
उक्त रकम दृष्टिबिहीन, अपांगता भएका व्यक्ति, गरिब, अनाथ, वृद्धा आश्रम र दुखीहरुको क्षेत्रमा खर्च गरिने उद्देश्य राखिएको छ । २५ जना ट्रक चालकहरुले प्रति व्यक्ति ५ सय रुपैयाँको दरले रकम संकलन गरेका उक्त कार्यको आरम्भ गरेका थिए । पूर्वेली ढुवानी सेवामा ५४ जना कार्यरत छन् ।