मेचीनगर । झापाको मेचीनगर नगरपालिकामा खेलकुदको महाकुम्भ मेचीनगर नगर ओलम्पिक हुने भएको छ । खेलकुद विकास समिति मेचीनगरको आयोजनामा फागुन २९ गतेदेखि विभिन्न विधामा नगरस्तरीय खेलकुद प्रतियोगिता हुन लागेको हो ।

मेचीनगरमा खेलकुदको विकास र प्रवर्द्धन गर्ने उदेश्यले आयोजना गर्न लागिएको नगर ओलम्पिकमा फुटबल, क्रिकेट, भलिबल, कबड्डी, कराते, तेक्वान्दो, बक्सिङ र एथलेटिक्सका खेलहरू हुने मेचीनगर बरिस्ठ प्रशासकीय अधिकृत तथा नगर खेलकुद विकास समिती सदस्य सचिव अनन्तप्रकाश वस्तीले जानकारी दिए ।

उनका अनुसार फुटवल (महिला- पुरुष), भलिवल (महिला-पुरुष), क्रिकेट (महिला-पुरुष), कवाडी (महिला-पुरुष), चेस–बुद्दिचाल (खुला), कराते (३० केजी. ३५ केजी, ४० केजी, ४५ केजी, ५० केजी, ५५ केजी र ६० केजी), बक्सिंग (३० केजी, ३५ केजी, ४० केजी, ४५ केजी, ५० केजी, ५५ केजी र ६० केजी) र तेक्वान्दो (३० केजी, ३५ केजी, ४० केजी, ४५ केजी, ५० केजी, ५५ केजी र ६० केजी) तौल समुहमा हुने छ ।

त्यस्तै एथलेटिक्स तर्फ हाइजम्प (महिला-पुरुष), लंगजम्प (महिला-पुरुष), सटपुट (महिला-पुरुष), ज्याभलिन (महिला-पुरुष), रिले १००८४ (पुरुष – ४), रिले १००८४ (मिक्स २ महिला – २ पुरुष), १०० मि. (महिला-पुरुष), २०० मि. (महिला-पुरुष), ४०० मि. (महिला-पुरुष), ८०० मि. (महिला-पुरुष) र ३००० मि. (महिला-पुरुष) ले प्रतियोगितामा सहभागी हुनेछन् ।

मेचीनगर खेलकुद विकास समिति उपाध्यक्ष रविन ओझाले फागुन २३ गतेसम्ममा नगरका पन्द्रवटै वडाबाट खेलाडीहरु छनोट सम्पन्न गरी नगरपालिका बुझाइ सक्नुपर्ने बताए । उनका अनुसार वडाबाट कराते, तेक्वान्दो, बक्सिङ खेलका लागि प्रत्येक तौल समुहबाट १ जना महिला र १ जना पुरुष छनौट गरीने छ । त्यस्तै फुटबल, क्रिकेट, भलिबल, कबड्डीखेलको पनि महिला र पुरुष दुवै टिम छनोट गरिने उनले बताए ।

प्रतियोगितामा सहभागी विजेता टिम तथा खेलाडीहरुलाई नगदसहित ट्रफि, मेडल र प्रमाण्पत्र वितरण गरिने मेचीनगर खेलकुद विकास समिति संयोजक हृदय राजवंशीले जानकारी दिए ।