श्रावण ६, २०८१ आईतबार

आर्थिक पत्रकारिता पुरस्कारबाट पत्रकार भण्डारी सम्मानित

मेचीनगर, २१ चैत । मेची उद्योग वाणिज्य संघको १९ औं वार्षिक साधारणसभामा राष्ट्रिय समाचार समिति झापाकी समाचारदाता अम्बिका भण्डारी मेची उद्योग बाणिज्य संघद्वारा स्थापित ‘आर्थिक पत्रकारिता पुरस्कार’ बाट सम्मानित हुनुभएको छ ।

धुलाबारीको रोयल निर्वाण सभाहलमा आज आयोजित कार्यक्रममा पत्रकार भण्डारीलाई नगद रु. २१ हजार राशी र सम्मान पत्रले पुरस्कृत गरिएको हो ।

यसैगरी, उत्कृष्ट कर्मचारीको रुपमा संघका एम्बुलेन्स चालक मिनबहादुर खड्का (कुमार)लाई नगद रु १५ हजारसहित सम्मान पत्रले पुरस्कृत गरिएको छ ।

राससको झापा कार्यालय प्रमुखको समेत जिम्मेवारी सम्हाल्नु भएकी भण्डारी दुई दशकदेखि निरन्तर पत्रकारिता क्षेत्रमा क्रियाशील हुनुहुन्छ । लोकतन्त्र पोस्ट, जनसंसद् र पूर्वाञ्चल दैनिकमा उहाँ कार्यरत हुनुहुन्थ्यो ।

संघले २०६९ सालदेखि आर्थिक क्षेत्रमा कलम चलाउने पत्रकारलाई पुरस्कृत गर्दै आएको छ । पहिलो पुरस्कार भद्रपुरका अग्रज पत्रकार गोविन्दचन्द क्षेत्रीले पाउनु भएको थियो ।

साधारणसभाको उद्घाटन कोशी उद्योग बाणिज्य महासंघका अध्यक्ष राजेन्द्र राउतले गर्नुभएको थियो । आजै उद्घाटन र बन्द सत्र सम्पन्न भएको छ । बन्द सत्रमा उद्योग वाणिज्य क्षेत्रका समस्या र तिनको समाधानका विषयमा छलफल भएको थियो ।

उहाँले कार्यक्रममा बन्दै गरेको एसियन हाइवेले विकासको थप ढोका खुल्ने सम्भावना बढेको कार्यक्रमका प्रमुख अतिथि समेत रहनु भएका प्रदेश अध्यक्ष राउतले बताउनुभयो । अध्यक्ष राउतले सरकारसँग तयारी वस्तु आयातमा दोब्बर कर बढाउन र कच्चा पदार्थ आयातमा सहुलियत दिन आग्रह गर्नुभयो ।

कार्यक्रममा बागमती प्रदेशका पूर्व प्रदेश प्रमुख विष्णु प्रसाईले भारतीय सीमावर्ती क्षेत्रमा जाँदा अझै पनि परिचय खुल्ने कागजात देखाउनु पर्ने झन्टझटिलो प्रवृत्तिलाई हटाउन बाणिज्य संघलाई पहल गर्न आग्रह गर्नुभयो । उद्योग बाणिज्य संघले शिक्षा, स्वास्थ्य र खेलकुदमा पुर्याएको योगदानको चर्चा गर्नुभएको थियो ।

मेची भन्सार कार्यालयका प्रमुख रामप्रसाद रेग्मीले भारतीय बजार गुल्जार हुँदा नेपाली बजार सुनसान हुने गरेको बताउनुभयो । उहाँले स्थलमार्गबाट सिधै भूटान–बंगलादेश व्यापार गर्ने मुख्या नाका काँकरभिट्टा रहेको जानकारी दिँदै स्वदेशी बजारलाई प्राथमिकतामा राखेर काम गर्न अनुरोध गर्नुभयो ।

कार्यक्रममा नेपाल पत्रकार महासंघका पूर्व महासचिव चन्द्र भण्डारीले भारतको पानीटेंकी सीमामा नेपालीलाई आउजाउमा गरिएको कडाईप्रति आपत्ति प्रकट गर्नुभयो । उहाँले नेपाल सरकारले भारतीय पक्षसँग दह्रोसँग बार्ता गर्नुपर्ने सुझाव दिनुभयो ।
उद्योग बाणिज्य महासंघका केन्द्रीय सदस्य उमेश डालमियाले सबैभन्दा बढी उद्योगी व्यवसायी पीडित रहेको बताउनुभयो । उहाँले भारतीय बजार गुल्जार हुँदा नेपाली व्यापारी व्यवसायीहरुले सटर खाली गर्नुपर्ने स्थितिमा पुगेको बताउनुभयो ।

महासंघका केन्द्रीय सदस्य नरेन्द्र खड्काले सरकारको ढिकुटीमा पैसा थुप्रिए तापनि सत्ता परिवर्तनको खेल भइरहँदा सही सदुपयोग हुन नसकेको बताउनुभयो ।

झापा उद्योग संघका अध्यक्ष यामबहादुर श्रेष्ठ, मेचीनगर नगरपालिका पूर्व प्रमुख विमल आचार्य, मेचीनगर नगरपालिकाका आर्थिक शाखा प्रमुख पदमबहादुर कार्कीलायतले शुभकामना मन्तव्य व्यक्त गरेको कार्यक्रममा अध्यक्ष प्रसाईले संस्थाले बर्षभरि गरेका गतिविधिको बारेमा बार्षिक प्रतिवेदन प्रस्तुत गर्नुभएको थियो । संस्थाका महासचिव दिनेश शाक्यले सञ्चालन गरेको कार्यक्रमको समापन बरिष्ठ उपाध्यक्ष कपिल क्षेत्रीले गर्नुभएको थियो ।

 

प्रकाशित मिति : चैत्र २१, २०८० बुधबार  ६ : ०७ बजे

प्रतिक्रिया दिनुहोस्
लोकप्रिय
ताजा

इजलास मिडिया प्रा.लि द्वारा संचालित

कार्यालय सम्पर्क - बिर्तामोड ४,झापा
सूचना बिभाग दर्ता नं. : ३९९२- २०७९/०८०
सम्पर्क : ९८५२६४५०२८
ईमेल : [email protected]