बिर्तामोड । युवामैत्री स्थानीय तह, अन्तर पार्टी युवा संजाल निर्माण लगायतका ८ बु“दे घोषणा पत्र जारी गर्दै झापा जिल्ला युवा सम्मेलन आइतवार बिर्तामोडमा सकिएको छ ।

दुई दिने सम्मेलनले झापा सहित मुलुककै गम्भीर समस्याको रुपमा रहेको लागु औषध प्रयोग तथा ओसार—पसारमा बढ्दै गएको युवा संलग्नताले पर्न गएको सामाजिक, आर्थिक एवं मनोवैज्ञानिक असरलाई कम गर्न भईरहेका सबैखाले कार्यक्रम, अभियानहरुलाई अझ बढी प्रभावकारी रुपमा अघि बढाउन सरोकारवालाहरुको ध्यानकर्षण गराउने र कानून, नीति, नियमको प्रभावकारी कार्यान्वयनका लागि जोडदार माग गरेको छ ।

त्यस्तै दिगो विकास लक्ष्यलाई हासिल गर्नका लागि झापा जिल्लाका युवाले महत्वपूर्ण भुमिका निर्वाह गर्ने कुराप्रति ऐक्यवद्धता जनाउँदै कार्यान्वयनका लागि जिल्लालाई संन् २०३० अगावै दिगो विकास लक्ष्य हासिल गरेको जिल्ला बनाउन जिल्लास्थित सम्पूर्ण सरोकारावालहरुको ध्यानाकर्षण गराउने जनाइएको छ ।

झापालाई शून्य आयातयुक्त जिल्ला घोषणा गर्न सामूहिक अभियान संचालन गर्ने जनाइएको छ । नेपालको कुल जनसंख्याको करीब ४० दशमवल ३५ प्रतिशत जनसंख्या रहेको युवा शक्तिलाई जिल्लास्थित सबै निकाय, तहहरुमा युवाको पहिचान, पहुच र प्रतिनिधित्व स्थापित गर्दै योजना निर्माण, कार्यान्वयन तथा प्रतिफलको बाँडफाँडमा न्यायोचित र समानुपातिक हिस्सेदारीको सुनिश्चितताको लागि माग गरिएको छ ।

त्यस्तै विभिन्न किसिमका विभेद, असमानता र अन्धविश्वासको अन्त्य गर्दै सामाजिक—सांस्कृतिक रुपान्तरणका लागि व्यापक युवा सहभागितामा प्रभावकारी जिल्लास्तरीय अभियान संचालन गर्न सामुहिक प्रतिवद्धता जनाइएको जिल्ला समन्वय समितिका प्रमुख सोमनाथ पोर्तेलले जनाए ।

जिल्ला समन्वय समिति झापाको आयोजना र कारितास नेपालको सहकार्यमा सम्पन्न कार्यक्रमको दोस्रो दिन विभिन्न तीन विषयहरुमाथि बहस भएको थियो । पहिलो सत्रमा युवा स्वरोजगार र उद्यमशिलता विषयमा राष्ट्रिय युवा परिषदका उपाध्यक्ष माधव ढुंगेलले कार्यपत्र प्रस्तुत गरे । सहकारीकर्मी महेन्द्र गिरी र संविधास सभा सदस्य प्रेम गिरीले टिप्पणी गरे । दोस्रो सत्रमा सामाजिक सांस्कृति रुपान्तरणमा युवा अग्ररता विषयमा युवा नेता नवराज शंकर, दलित अधिकारकर्मी उमेश विश्वकर्मा र मेचीनगरकी उपप्रमुख मीना उप्रेतीवीच निरोज कट्टेलले छलफल चलाएका थिए । उनीहरुले नेपाली समाजको वर्तमान समस्या र समाधानका बारेमा बहस गरेका थिए ।

अन्तिम सत्रमा राज्यको नीति निर्माण र कार्यान्वयनमा युवा सहभागिता विषयमा पूर्व मन्त्री महेश बस्नेत र राष्ट्रिय सभाका सांसद बद्री पाण्डेलाई पत्रकार गणेश पोख्रेलले बहस गराए । पूर्व मन्त्री बस्नेतले नीति निर्माणमा युवाको हस्तक्षेपकारी भूमिका हुनुपर्ने बताए । सांसद पाण्डेले नीति निर्माण र कार्यान्वयन तहमा युवाको भूमिका कमजोर रहेको बताएका छन् ।

जिल्लाका १५ वटै स्थानीय तहका युवा जनप्रतिनिधि, विधार्थी, राजनीतिक दलका युवा , महिला उद्यमी, व्यवसायीको सहभागितामा भएको सम्मेलनको पहिलो दिन

इन्द्र प्रसाद ओलीले लागु औषध दुव्र्यसन विरुद्ध युवाको भूमिका विषयक कार्यपत्र प्रस्तुत गरेका थिए । सो कार्यपत्रमा जिल्ला प्रहरी कार्यालय झापाका प्रहरी प्रमुख प्रहरी उपरीक्षक कृष्ण कोइराला र गौरादह नगरपालिकाका प्रमुख रोहित कुमार शाहले टिप्पणी गरेका थिए ।

कमल कोइरालाले दिगो विकास लक्ष्यमा युवाको भूमिका विषयक प्रस्तुत गरेको कार्यपत्रमा युवा नेता सिपि कडरिया र एस.एन.जे.डीका कुमार चुडालले टिप्पणी गरेका थिए । यस्तै, सञ्जय चौधरीले युवा परिचालन ( स्वयमसेवा, विपत जोखिम न्यूनिकरण र विकास निर्माण) विषयक प्रस्तुत गरेको कार्यपत्रमा युवा नेता शिव ढुङ्गेल र जिल्ला युवा समिति झापाका अध्यक्ष छवि चुडालले टिप्पणी गरेका थिए ।

यस्तो छ ८ बुँदे घोषणा पत्र

१. राष्ट्रिय युवा नीति २०७२ र युथ भिजन २०२५ ले परिकल्पना गरे बमोजिम युवा शक्तिलाई गुणस्तरीय र व्यवसायिक शिक्षा, युवा रोजगारी, उद्यमशीलता र सीप विकास, युवा स्वास्थ्य र सामाजिक सुरक्षा, युवा परिचालन, सहभागिता र नेतृत्व विकास तथा युवाहरुको लागि खेलकूद र मनोरञ्जनको माध्यमबाट समृद्धिको मार्गमा अघि बढ्ने गरिको नीति, कार्यक्रम र आवश्यक बजेटको व्यवस्था गर्दै युवामैत्री स्थानीय तह निर्माण गर्न झापा जिल्लाका सबै स्थानीय तहहरुको गम्भिर ध्यानाकर्षण गर्दछौं ।

२. झापा जिल्लासहित आज मुलुककै गम्भिर समस्याको रुपमा रहेको लागु औषध प्रयोग तथा ओसार—पसारमा बढ्दै गएको युवा संलग्नताले पर्न गएको सामाजिक, आर्थिक एवं मनोवैज्ञानिक असरलाई कम गर्न भईरहेका सबैखाले कार्यक्रम, अभियानहरुलाई अझ बढी प्रभावकारी रुपमा अघि बढाउन सरोकारवालाहरुको ध्यानकर्षण गराउँदै यससँग सम्बन्धित कानून, नीति, नियमको प्रभावकारी कार्यान्वयनका लागि जोडदार माग गर्दछौ ।

३. दिगो विकास लक्ष्यलाई हासिल गर्नका लागि झापा जिल्लाका युवाले महत्वपूर्ण भुमिका निर्वाह गर्ने कुराप्रति ऐक्यवद्धता जनाउदै सोको कार्यान्वयनका लागी स्थानीय सरकारलाई निति निर्माण तथा कार्यान्वयनमा आवश्यक सहयोग र समन्वय गर्दै यसको प्रचार—प्रसार गरी परिणाममुखी वनाउन बनाउँदै झापा जिल्लालाई संन् २०३० अगावै दिगो विकाश लक्ष्य हासिल गरेको जिल्ला बनाउन जिल्लास्थित सम्पूर्ण सरोकारावालहरुकोध्यानाकर्षण गर्दछौं ।

४. विपद्जोखिम व्यस्थापन (बाढी, आगलागि, हात्ति आतंक, सडक दुर्घटना लगायत) का हिसाबले झापा जिल्ला अती उच्च जोखिममा रहेको हूँदा विपद् जोखिमको समयभन्दा अगाडी, भएको समयमा र विपद् पश्चात् युवाहरुलाइविपद् जोखिमको अल्पिकरण, प्रतिकार्य, पुनर्लाभ र पुनस्र्थापना कार्यको लागि युवा अग्रसरताको लागि नीति, कार्यक्रम र बजेटको उच्चतम व्यवस्थापन गर्नको लागि सम्पूर्ण सरोकारवालाहरुको ध्यानकर्षण गर्दछौं ।
५. झापा जिल्लालाई पुर्ण युवा रोजगार जिल्ला बनाउन युवा उद्यमशिलता र उत्पादन कार्यलाई केन्द्रबिन्दुमा राखि बैक तथा वित्तीय संस्थाहरुसँग समन्वय गरी सहुलियतपूर्ण कर्जा प्रवाह गर्ने वातावरण सिर्जना गरेर युवालाई उद्यमशीलता र रोजगारीको क्षेत्रमा समावेश गराउँदैकृषि उत्पादनको क्षेत्रमा झापा जिल्लालाई शुन्य आयातयुक्त जिल्ला घोषणा गर्न सामूहिक अभियान संचालन गर्न ऐक्यबद्धता जनाउँदछौं ।

६. नेपालको कुल जनसंख्याको करीब ४०.३५ प्रतिशत जनसंख्या रहेको युवा शक्तिलाई जिल्लास्थित सबै निकाय, तहहरुमा युवाको पहिचान, पहुँच र प्रतिनिधित्व स्थापित गर्दै योजना निर्माण, कार्यान्वयन तथा प्रतिफलको बाँडफाँडमा न्यायोचित र समानुपातिक हिस्सेदारीको सुनिश्चितताको लागि जोडगर्दछौं ।

७. समाजमा विद्यमान सबैखाले (वर्गीय, लैंगिक, जातीय, भाषिक, धार्मिक, भौगोलिक लगायत) विभेद, असमानता एवं अन्धविश्वास, कुरिती र कु—संस्कारको समूल अन्त्य गर्दै≤ सामाजिक—सांस्कृतिक रुपान्तरणका लागि व्यापक युवा सहभागितामा प्रभावकारी जिल्लास्तरीय अभियान संचालन गर्न हामी सामूहिक प्रतिबद्धता व्यक्त गर्दछौं ।

८. झापा जिल्लाको हकमा युवाको क्षेत्रमा सामूहिक एवं साझा ढंगले काम गर्नको लागि “अन्तर पार्टी युवा संजाल” को निर्माण गर्नको लागि आवश्यक प्रक्रिया अगाडि बढाउनको लागि हामी सामूहिक प्रतिवद्धता व्यक्त गर्दछौं ।