धुलाबारी । मेचीनगर आधारभूत अस्पताल परिसरमा रहेको सामुदायिक बहुउद्देश्यीय भवनको स्वामित्व नगरपालिकाले लिएको छ । मंगलवार खानेपानी तथा ढल व्यवस्थापन विभाग अन्तरगतको आयोजना व्यवस्थापन कार्यालयले मेचीनगर नगरपालिकालाई उक्त भवनको स्वामित्व हस्तान्तरण गरेको हो ।

आयोजना व्यवस्थापन कार्यालयका वरिष्ठ ईन्जिनियर किशोर पन्थी र नगरप्रमुख गोपालचन्द्र बुढाथोकीले स्वामित्व पत्र एक अर्कामा हस्तान्तरण गरेका थिए ।

हस्तान्तरण कार्यक्रममा नगरप्रमुख बुढाथोकी, ईन्जिनियर पन्थी, प्रमुख प्रशासकीय अधिकृत अग्निप्रसाद अधिकारी, वरिष्ठ प्रशासकीय अधिकृत अनन्तप्रकाश वस्ती, स्वास्थ्य शाखा प्रमुख सविता सापकोटा, शिक्षा शाखा प्रमुख होमनाथ भण्डारी लगायतको उपस्थिति रहेको थियो ।

१६ वेडको भवन २०७९ चैत १० गते निर्माण सुरु गरेर २०८१ पुस १४ गते सम्पन्न भएको थियो । भवन हस्तान्तरण हुन मात्र बाँकी रहेको थियो ।

भवन, अक्सिजन सिलिण्डर र वेडसहित दुई करोड ४२ लाख ५३ हजार ३०५ रुपैयाँ खर्च भएको आयाजनाले जनाएको छ । नवनिर्मित भवनमा महिला र पुरुष अपाङ्ग मैत्री शौचालय, १६ वेड क्षमताको २ वटा ठुला कोठा, प्रशासनिक, नसिङ, स्टोर, १६ वटा अक्सिजन सिलिण्डर रहेको छ ।

स्वास्थ्य शाखा प्रमुख सापकोटाले आजबाट उक्त भवनको स्वामित्व नगरपालिकाले लिएको बताइन् । उक्त भवन एडीवीको सहयोग निर्माण भएको थियो । उनका अनुसार भवनमा भिडियो एक्सरे मेसिन, थाइराइड, वेडहरु, अक्सिजन सिलिण्डर लगायतका सामग्री जडान गर्ने काम भइरहेको छ ।

सेवाग्राहीको सुविधाका लागि आगामी जेठको पहिलो हप्तादेखि नयाँ भवनबाट पनि थप सेवा विस्तार गरिने उनको भनाई छ । नगर अस्पतालमा विशेषज्ञ सेवाहरुमा प्रत्येक मंगलबार स्त्री रोग तथा प्रसुती सेवा, विहीबार बालरोग तथा नाक, कान र घाँटीको सेवा, शुक्रबार जनरल फिजिसियन सेवा, दैनिक विहान ६ वजेदेखि ओपिडी सेवा, ईसीजी, युएसजी सेवा, बीमा तथा अन्य निःशुल्क सेवाहरु विशेषज्ञ र एमवीवीएस डाक्टरहरुबाट दिँदै आएको छ ।

नगर अस्पतालमा रेविज र मधुमेहका विरामीहरुको इन्सुलिन अभाव रहेको नगरबासीको गुनासो आएपछि नगरप्रमुख गापालचन्द्र बुढाथोकीको पहलमा काठमाडौँबाट उक्त सामग्रीहरु अस्पतालमा ल्याइपुर्याएको सापकोटाले जानकारी दिइन् ।