बिर्तामोड – झापाको बिर्तामोडस्थित बिर्तामोड स्पोर्टस सेन्टरमा भएको प्रथम बिर्तामोड फुट–७ कप खुला फुटसल प्रतियोगिताको उपाधि योङ युथ एफसी धरानले जितेको छ ।

आइतवार साँझ भएको फाइनल खेलमा आयोजक बिर्तामोड स्पोर्टस सेन्टर ‘ए’ लाई पराजित गर्दै योङ युथ च्याम्पियन बनेको हो । योङ युथले आयोजकलाई ४-२ गोल अन्तरले हराएको हो ।

उपाधिसँगै धरानले नगद एक लाख, ट्रफी र मेडल प्राप्त गरेको छ । उपविजेतामा सीमित आयोजकले नगद ५० हजार, ट्रफी र मेडलमा चित्त बुझायो ।

प्रतियोगिताको सर्वोत्कृष्ट खेलाडीले नगद १० हजार, ट्रफी र मेडल पाए भने उच्च गोलकर्ता र गोलकिपरले नगद पाँच हजार, ट्रफी र मेडल प्राप्त गरेका थिए ।

प्रतियोगिता बिर्तामोड–५ स्यालडाँगीनजिकै रहेको बिर्तामोड स्पोट्र्स सेन्टरद्वारा सञ्चालित फुटसल कोर्टमा विजेता तथा उपविजेतालाई सेन्टरका अध्यक्ष सञ्जीव प्रसाईं, सञ्चालक गणेश कटवाल, प्रमुख अतिथि झापा ११ एफसीका अध्यक्ष जलकुमार गुरुङ, बिर्तामोड ३ का वडा अध्यक्ष मदन बुढाथोकी, ५ का वडा अध्यक्ष रोहित प्रसाईं, ६ का वडा अध्यक्ष सूर्यप्रसाद कन्दङवा लगायतले पुरस्कार वितरण गरेका थिए ।

प्रतियोगितामा नेपाल र भारतका ३२ वटा टिमको सहभागिता रहेको थियो । झापाका २०, सुनसरी, इलाम र पाँचथरका ९ तथा भारतका ३ टिम प्रतियोगितामा सहभागी थिए ।