बिर्तामोडमा जनता आवासको अनुगमन
बिर्तामोड । बिर्तामोड नगरपालिकाले वडा नम्बर ७ मा जनता आवास कार्यक्रम अन्तर्गत बनेका घरहरुको अनुगमन गरेको छ ।
नगर उपप्रमुख नगेन्द्र प्रसाद संग्रौला, नगरका लेखा प्रमुख तेजेन्द्र तामाङ, उपभोक्ता समितिका अध्यक्ष बद्री प्याकुरेल लगायतको टोलीले घरहरुको अनुगमन गरेको हो ।
यस वडामा ६ वटा घर निर्माणका लागि गत आर्थिक वर्षमा छुट्टीएको बजेटबाट बनेका घरहरुको अनुगमन गरिएको नगर उपप्रमुख नगेन्द्र प्रसाद संग्रौलाले बताए । उनले निर्बाचन लगायत विविध कारणले घर निर्माणमा ढिलाई भएको बताएका छन् ।
प्रति घर २ लाख २० हजारका दरले जम्मा १३ लाख २० हजार रुपैयांमा ६ वटा घर निर्माणका लागि बजेट छुटिएको थियो । तर निर्माणका क्रममा नगरले दिएको बजेटको अतिरिक्त रकम घरधनी आफैले थप गरेर समेत घर निर्माण गरिएकोले फरक–फरक ढंगका घरहरु निर्माण भएको उपभोक्ता समितिका अध्यक्ष प्याकुरेलले जानकारी दिए ।
वडाका कर्ण बहादुर शेर्मा, प्रेमा कुमारी सार्की, शोवी सार्की, उमा दाहाल, मन्जु सोरेन र धनमाया निरौलाको घर निर्माण गरिएको हो ।
नगर उपप्रमुख संग्रौलाले बिर्तामोड नगरपालिकाभित्र विगत ५ वर्ष यता जनता आवास कार्यक्रम अन्तर्गत ६ सय भन्दा बढी घरहरु निर्माण भएको जानकारी दिए । उनले यस चालु आर्थिक वर्षमा समेत सहारा नेपाल र ह्यावी ट्याट नेपालसँगको सहकार्यमा घरहरु निर्माण हुने बताए ।
उपप्रमुख संग्रौलाले बिर्तामोड नगरपालिका जनताको आवास सुनिश्चित गर्ने तर्फ रहेको र आगामी दिनमा समेत यसैगरी घर निर्माण गर्दै जाने बताएका छन् ।