गौरादह – गौरादह नगरपालिकाको सहयोगमा नारी सञ्चार गृह झापांद्वारा आयोजित  स्थानीय विकास निर्माणमा  सञ्चारको भूमिका, पालिकाको अपेक्षा  र स्थलगत रिपोर्टिङ सम्बन्धी दुई दिने तालिम  गौरादहमा सम्पन्न भएको छ ।  आयोजक संस्थाकी अध्यक्ष रेजिना गौतमको अध्यक्षतामा तथा नेपाल पत्रकार महासंघ कोशी प्रदेश उपाध्यक्ष अम्बिका भण्डारीको प्रमुख आतिथ्यतामा तालिम सम्पन्न भएको हो ।

तालिममा विकास पत्रकारिता, विकास पत्रकारिताको महत्व र पत्रकारले ध्यान दिनुपर्ने कुरा र अपनाउनुपर्ने सजगता, तथ्यको महत्व, विकास तथा खोज पत्रकारिता सम्बन्धी अन्यदेशमा भएका अभ्यास, स्थानीय विकासमा त्यसले पार्ने प्रभाव, खोज पत्रकारिता र खोज पत्रकारिताले ल्याउने परिवर्तन लगायतका विषयमा सहजीकरण गरिएको थियो ।

तालिम पश्चात सहभागीहरुले नगरपालिका समेतको लागत सहभागीतामा सञ्चालित विउ, उत्पादन, परालबाट उत्पादित साइलेन्स घाँस उत्पादन तथा विक्री वितरण र परियोजना, जातीय पोशाकको संरक्षणका लागि सञ्चालित पेटानी बुनाई तालिम लगायतका कृषि तथा लक्षित कार्यक्रमका विषयमा स्थलगत रिपोर्टिङको अभ्यास गरेका थिए ।

गौरादह नगरपालिका वडा नं ५ मा अवस्थित नमुना पाहुना घरमा  जेठ ९ गते देखि शुरु भएको तालिमको सहजीकरण नेपाल पत्रकार महासंघ पूर्व केन्द्रिय अध्यक्ष शिव गाउँलेले  गर्नुभएको थियो भने तालिममा गौरादह नगरपालिका, दमक र बिर्तामोडकासहित पत्रकारहरुको  सहभागिता रहेको  थियो ।

यसअघि शुक्रबार तालिमको तालिमको उदघाटन गर्दै गौरादह नगरपालिकाकी उपप्रमुख जलवर्षा राजवंशीले सञ्चार र स्थानीय तहबीचको सम्बन्ध समन्वयकारी हुनुपर्नेमा जोड दिंदै स्थानीय तहले गरेका कामहरुबारे पनि उजागर गरेर मनोबल बढाउनुपर्नेमा जोड दिनुभयो ।

जनताका असिमित चाहना सिमित स्रोत परिचालनबाट काम गर्नुपर्ने बाध्यात्मक परिस्थितिबारे पनि बुझ्न र बुझाउन जरुरी रहेको बताउनु भयो । साथै नगरपालिकामा समुदाय लक्षित, विभिन्न जातजाति लक्षित, उद्यमशीलता, आयआर्जन तथा स्थानीयको मौलिक भेषभूषाको संरक्षणमा नगरले गरेका प्रयास, अपाङ्गता तथा अन्य विकास निर्माणका  क्षेत्रमा भएका कार्यक्रमबारे जानकारी दिनुभयो ।

सो अवसरमा बिशेष अतिथि नगरपालिकाका प्रमुख प्रशासकीय अधिकृत कृष्णप्रसाद सुवेदीले नगरमा सञ्चालित भौतिक पूर्वाधार तथा  विकास निर्माणका योजना र तिनीहरुको निर्माण अवस्थाबारे जानकारी दिनुभएको छ ।

आयोजक संस्थाकी सहसचिव जोस्ना श्रेष्ठले सञ्चालन गरेको कार्यक्रममा स्वागत तालिम संयोजक दिपा पोखरेलले गर्नुभएको थियो । गौरादह नगरपालिका वडा नं. ३ की वडासदस्य कल्पना अधिकारी लगायतले मन्तव्य राख्दै वास्तविक समाचार र सामाजिक सञ्जालमा पोष्ट गरिने कुराको सत्यता जाँच सम्बन्धी तालिमको आवश्यकता औल्याउनु भयो ।

स्थानीय तह र सञ्चार क्षेत्रलाई जोड्ने उद्देश्यले आयोजित तालिम समापनका क्रममा सान नेपाल र सिर्जना परियारले तालिम महत्वपूर्ण रहेको धारणा राखेका थिए ।