काठमाडौं।  साबिक विजेता अर्जेन्टिनाले केप भर्डेलाई ३–२ ले पराजित गर्दै फिफा विश्वकप २०२६ को अन्तिम १६ मा स्थान बनाएको छ।

शनिबार भएको रोमाञ्चक अन्तिम ३२ को खेलमा अफ्रिकाको सानो टापु राष्ट्र केप भर्डेले अतिरिक्त समयको अन्तिम क्षणसम्म अर्जेन्टिनालाई चुनौती दिएको थियो। तर‚ अन्ततः अर्जेन्टिना आफ्नो अनुभवका आधारमा विजयी हुँदै अर्को चरणमा पुग्न सफल भयो।

अर्जेन्टिनालाई निर्णायक अग्रता दिलाउने गोल १११औं मिनेटमा आयो। क्रिस्टियन रोमेरोको हेडर केप भर्डेका डिने बोर्जेसमा लागेर गोलमा परिणत भएपछि अर्जेन्टिनाले ३–२ को अग्रता बनाएको थियो। उक्त गोल आत्मघाती गोलका रूपमा दर्ज गरिएको छ।

Argentina’s Lionel Messi (10) battles with Cape Verde’s Deroy Duarte (14) and Ryan Mendes (20) during the World Cup round of 32 soccer match between Argentina and Cape Verde in Miami Gardens, Fla., Friday, July 3, 2026. (AP Photo/George Walker IV)मेसीले खेलको २९औं मिनेटमा गोल गर्दै अर्जेन्टिनालाई सुरुआती अग्रता दिलाएका थिए। लिसान्द्रो मार्टिनेजको पासमा उत्कृष्ट रन बनाएका उनले गोलरक्षक भोजिन्हालाई छल्दै बललाई जालीको माथिल्लो कुनामा प्रहार गरेका थिए। यो मेसीको विश्वकप करिअरको २०औं गोल हो, जससँगै उनले आफ्नो कीर्तिमान अझै फराकिलो बनाएका छन्।

केप भर्डेका सिड्नी लोपेस काब्राल र डेरोय डुआर्टेले दुई पटक बराबरी गोल गर्दै अर्जेन्टिनालाई दबाबमा राखेका थिए। दक्षिण फ्लोरिडामा उपस्थित अधिकांश अर्जेन्टिनी समर्थकलाई यी गोलले स्तब्ध बनाएको थियो।

अतिरिक्त समयको १०३औं मिनेटमा लिसान्द्रो मार्टिनेजले गोल गर्दै अर्जेन्टिनालाई २–१ ले अगाडि बढाएका थिए। तर‚ केप भर्डेले फेरि उत्कृष्ट पुनरागमन गर्दै खेललाई बराबरीमा ल्यायो। अन्ततः आत्मघाती गोलले खेलको नतिजा तय गर्‍यो।

अब अर्जेन्टिनाले क्वार्टरफाइनल प्रवेशका लागि इजिप्टसँग प्रतिस्पर्धा गर्नेछ। इजिप्टले यसअघि अष्ट्रेलियालाई टाइब्रेकरमा हराउँदै अन्तिम १६ मा स्थान बनाएको थियो।

विश्वकपमा पहिलो पटक सहभागी भएको केप भर्डेको यात्रा भने निकै सम्झनलायक रह्यो। ४० वर्षीय गोलरक्षक भोजिन्हाको उत्कृष्ट प्रदर्शनमा टोलीले स्पेन, उरुग्वे र साउदी अरेबियासँग अप्रत्याशित बराबरी नतिजा निकाल्दै नकआउट चरणमा स्थान बनाएको थियो। विश्वकपको नकआउट चरण पुग्ने सबैभन्दा सानो राष्ट्रको कीर्तिमान पनि केप भर्डेले बनाएको छ।

अर्जेन्टिनाविरुद्धको खेलमा भोजिन्हाले १० वटा महत्त्वपूर्ण बचाउ गरे, जसमध्ये पाँच बचाउ मेसीका प्रहार थिए। उनको उत्कृष्ट प्रदर्शनका बाबजुद केप भर्डेको ऐतिहासिक यात्रा अन्तिम ३२ मै टुंगिएको छ।

यता, मेसीले जारी विश्वकपमा सात गोल पुर्‍याएका छन्। गोल्डेन बुट दौडमा उनी फ्रान्सका केलियन एमबाप्पेभन्दा एक गोलले अगाडि छन्। साथै, लगातार आठ खेलमा गोल गर्ने क्रममा उनले १२ गोल गरिसकेका छन्।