काठमाडौ । सरकारको ‘गरिबमारा’ नीतिको कारण गणेश नेपालीले आत्मदाह गरेको वक्ताहरुले आरोप लागाएका छन् ।

शनिबार राजधानीमा भएको कार्यक्रममा उनीहरुले न्याय नभए संघर्षलाई चर्काउने चेतावनी समेत दिएका छन् ।

संघीय सांसद पार्वती विकले वर्तमान सरकार गरिब जनतालाई उकास्नेभन्दा भौतिकरुपले सकाउने दिशाको सिकार गणेश नेपाली भएको जिकिर गरेकी छन् ।

विकले मृतकको विषयमा गृहमन्त्री सुदन गुरुङले झुट बोलेको बताउँदै भनिन्, ‘आवश्यक परे भारत लगेर उपचार गराउँछु, भनेर ‘स्टन्टबाजी’ गरेर वीर अस्पतालमा मर्न छाड्नुभयो ।’

मृतक नेपालीलाई न्यायबाट बञ्चित गराउन आत्महत्या पुष्टि गराउन खोजिएको आरोप लगाउँदै सांसद विकले भनिन्, ‘गणेश नेपालीको कायरता हैन, श्रमिक वर्गमाथि गरेको राज्यविरुद्धको विद्रोह हो, दुई दिन अघि राइडरहरुले सरकालाई ज्ञापनपत्र दिएका रहेछन्, त्यसमा सरकार किन मौन । अब पनि जनता चुप रहने हो र गणेश नेपालीहरुले न्याय पाएनन् भने आम श्रमिक तथा गरिखाने वर्गलाई यो देशमा बाँच्न गाह्रो हुनेछ,’ विकले थपिन् ।

सामाजिक अभियान्ता डा. निर्मल विश्वकर्माले गणेश नेपालीलाई राज्यले आत्मदाह गर्न बाध्य बनाएको भन्दै आक्रोश व्यक्त गरे ।

पूर्वराजदूत समेत रहेका विश्वकर्माले गणेशको आत्मदाहाको मुख्य कारण ‘अव्यावहारिक ट्राफिक जरिवाना’ रहेको दाबी गर्दै त्यसलाई खारेजी र जनमैत्री प्रणाली लागू गर्न माग गरेका छन् ।

उनले पीडामा रहेका उत्पीडित तथा गरिब जनतालाई माथि उठाउनेभन्दा सरकार उनीहरुलाई नै भौतिकरुपले सकाउने दिशातिर अघि बढेको आरोप लगाए ।

दलित अधिकारकर्मी केशव नेपालीले गणेशको मृत्युले वर्तमान सरकार धनीहरुको मात्रै भएको प्रष्टिएको बताए । गणेश नेपाली जस्ता गरिखाने जनतालाई बाँच्न पाउने अधिकारबाट नीतिगत रुपमै च्युत गरिरहेको भन्दै सरकारको आलोचना गरे ।

‘सरकार धनाड्य र रईसहरुको हो थाहा भइसक्यो, थानकोट चेक पोष्टमा ‘लाइसिन्स’ र ‘ब्लुबुक’ चेक गर्नुभन्दा ‘लालपूर्ज’ चेक गर्नुपरो, राजधानीमा लालपूर्जा भएकालाई मात्रै काठमाडौं छिराउने नियम बनाउ बालेन सरकार,’ नेपालीले भने ।

जेनजी युनाइटेडका संयोजक जनक परियारले गणेश नेपालीको आत्मदाह गरिब तथा श्रमीक वर्गको अधिकारको लागि ‘बालेन सरकार’विरुद्धको पहिलो सहादत भएको जिकिर गरे ।

परियारले घटनाको निष्पक्ष छानबिन र आत्मदाह गर्न बाध्य पार्ने दोषीहरूमाथि कडा कानुनी कारबाही हुनुपर्ने माग गरे ।

राष्ट्रिय जेनजी नागरिक अभियानका प्रवक्ता विर्जन विकले पीडित परिवारलाई तत्काल उचित क्षतिपूर्ति र राहत दिनुपर्ने माग गरे ।

श्रमसंस्कृति पार्टीका युवा नेता निर्मल परियारले पीडित परिवारको वर्तमान सरकार एकपछि अर्को गर्दै जनतामाथि नीतिगत रुपमै अत्याचार थोपर्ने दिशातिर जाँदाको परिणाम गणेशको आत्मदाह भएको बताए ।