नयाँ दिल्ली । भारतका केन्द्रीय शिक्षामन्त्री धर्मेन्द्र प्रधानले पदबाट राजीनामा दिएपछि पाँच हप्तादेखि चलिरहेको ‘कक्रोच जनता पार्टी’ (सीजेपी)को आन्दोलन स्थगित भएको छ । आन्दोलनकारीले  यसलाई लोकतन्त्रको जित भन्दै प्रदर्शन अन्त्य गर्ने घोषणा गरेका बीबीसीले जनाएको छ ।

दिल्लीको जन्तर–मन्तरमा आन्दोलनरत हजारौँ प्रदर्शनकारीहरूले शिक्षामन्त्रीको राजीनामापछि नाचगान, नाराबाजी र मिठाई बाँडेर उत्सव मनाएका छन् । आन्दोलनका संस्थापक अभिजीत दिप्केले “हामी सफल भयौँ” भन्दै यो युवाहरूको ऐतिहासिक जित भएको बताउनुभएको छ ।

शिक्षामन्त्री धर्मेन्द्र प्रधानले सामाजिक सञ्जाल एक्समार्फत राजीनामा घोषणा गर्दै पछिल्ला घटनाले आफू दुःखी भएको र विद्यार्थीहरूको भविष्यलाई ध्यानमा राखेर प्रधानमन्त्रीसमक्ष राजीनामा बुझाएको बताउनुभएको छ । ‘कक्रोच जनता पार्टी’ कुनै औपचारिक राजनीतिक दल नभई कृत्रिम बुद्धिमत्ता (एआई) बाट तयार गरिएको ‘कक्रोच’ प्रतीकमार्फत शुरु गरिएको व्यङ्ग्यात्मक अभियान हो ।

भारतको शिक्षा प्रणालीमा सुधार, परीक्षा प्रश्न पत्र चुहावट रोक्न कडा कानुन तथा शिक्षामन्त्रीको राजीनामाको माग गर्दै यो अभियानले व्यापक समर्थन पाएको थियो । शिक्षाविद् तथा अभियन्ता सोनम वाङचुकले आन्दोलनलाई समर्थन गर्दै आमरण अनशन बसेपछि प्रदर्शन थप सशक्त बनेको थियो । प्रधानमन्त्री नरेन्द्र मोदीले परीक्षा प्रश्न पत्र चुहावटमा संलग्नलाई कडा सजाय दिन द्रुत अदालत गठन गर्ने तथा नयाँ कानुन ल्याउने घोषणा गरेपछि आन्दोलनको दबाब थप बढेको थियो । य

द्यपि आन्दोलनका संस्थापक दिप्केले शिक्षामन्त्रीको राजीनामा मात्रै अन्तिम लक्ष्य नभएको स्पष्ट पार्नुभएको छ । यस आन्दोलनलाई पछिल्ला वर्षहरूमा प्रधानमन्त्री मोदी सरकारविरुद्ध देखिएको सबैभन्दा प्रभावशाली युवा आन्दोलनका रूपमा हेरिएको छ ।