विराटनगर । सुनसरीको हरिनगरामा बुधबार दिउँसो प्रहरीको गाडीमा आक्रमण भएको छ । देवानगन्ज गाउँपालिका–३ कप्तानगन्जमा गत आइतबार राति भएको गोलीकाण्डको विरोधमा उत्रिएको समूहले नेपाल प्रहरीको गाडीमा ढुंगामुढा गरेको हो ।

आक्रमणबाट इलाका प्रहरी कार्यालय देवानगन्जका प्रमुख, इन्स्पेक्टर प्रकाश पराजुलीले प्रयोग गरिरहेको गाडीको अगाडिको भागमा क्षति पुगेको छ । सुनसरी प्रहरीका सूचना अधिकारी डीएसपी चन्द्रबहादुर खड्काले सुरक्षामा खटिएको प्रहरी टोली चढेको गाडीमा आक्रमण भएको जानकारी दिए ।

इलाका प्रहरी कार्यालय हरिनगराको ना १ झ ८७४ नम्बरको गाडीमा आक्रमण भएपछि अवस्था केहीबेर तनावपूर्ण बनेको थियो । दुई समूहबीच तनाव हुन लागेको जानकारी पाएर इन्स्पेक्टर पराजुली टोली लिएर हरिनगरा बजारमा पुगेका थिए । पराजुलीको टोलीले बजारमा भेला भएको समूहलाई सम्झाइबुझाइ गर्ने क्रममा गाडीमा एक्कासि ढुंगामुढा गरिएको डीएसपी खड्काले बताए ।

ढुंगाले लागेर गाडीको अगाडिको भागको सिसा फुटेको छ । फुटेको सिसा परिवर्तन गरेर मात्रै गाडी चलाउन सकिने अवस्थामा पुगेको हो । गाडीमा आक्रमण गरिएको भए पनि सुरक्षाकर्मीहरु भने सकुशल छन् । ‘घटनामा कुनै मानवीय क्षति भएन । गाडीको अगाडिको सिसा मात्रै फुटेको हो । ढुंगामुढा गर्ने समूह तत्काल फरार भयो,’ डीएसपी खड्काले बताए ।

कप्तानगन्जमा दुई पक्षबीच भएको हिंसात्मक झडप नियन्त्रणमा लिने क्रममा सशस्त्र प्रहरीले चलाएको गोली लागेर देवानगन्ज–४ का २५ वर्षीय ओमप्रकाश मेहताको मृत्यु भएको थियो । गोली लागेर नौ जना युवा घाइते भएका थिए । सुरक्षाकर्मीहरु पनि घाइते भएका छन् ।

घटनाको विरोधमा सुनसरीका विभिन्न स्थानमा दुई समूहबीच दोहोरो झडप, आक्रमण, आगजनी, तोडफोड र लुटपाटका घटना भएका छन् । स्थितिलाई नियन्त्रणबाहिर जान नदिन जिल्लाका विभिन्न १० वटा पालिकामा कर्फ्यु आदेश जारी गरिएको छ । बुधबारबाट अवस्था केही मत्थर हुँदै गएको छ ।