काठमाडौँ । देउवापक्षीय नेपाली कांग्रेसको १५औँ केन्द्रीय महाधिवेशन मंसिर २१, २२ र २३ गते काठमाडौँमा गर्ने गरी तयारी अघि बढाइएको छ ।

पूर्वमहामन्त्री डा. शशांक कोइराला संयोजक रहेको १५औँ केन्द्रीय महाधिवेशन तयारी समितिले बुधबार जारी गरेको प्रेस विज्ञप्तिमा महाधिवेशनको तयारीका लागि जिल्लादेखि वडा तहसम्म अधिवेशन तयारी समिति गठन भइसकेको जनाएको छ ।

समितिका अनुसार असोज १५ गते वडा अधिवेशन, असोज २० गते पालिका अधिवेशन र असोज २३ गते प्रदेशसभा निर्वाचन क्षेत्र तथा प्रतिनिधिसभा निर्वाचन क्षेत्रीय अधिवेशन गर्ने कार्यतालिका तय गरिएको छ । त्यस्तै, मंसिर ४ गते प्रदेश अधिवेशन सम्पन्न गर्ने तयारी छ।

समितिको विज्ञप्तिअनुसार १४औँ महाधिवेशनबाट निर्वाचित कार्यसमितिका सभापति शेरबहादुर देउवाको सभापतित्वमा १५औँ महाधिवेशन गर्ने निर्णय भएको हो ।