झापा । झापासहित कोशी प्रदेशका चार जिल्लामा लगातार दुई दिन बिहानैदेखि आठ घण्टा विद्युत् आपूर्ति बन्द हुने भएको छ । नेपाल विद्युत् प्राधिकरणले प्रसारण प्रणालीमा महत्वपूर्ण प्राविधिक काम गर्नुपर्ने भएपछि असोज १७ र १८ गते विद्युत् सेवा अवरुद्ध गर्न लागेको हो ।

प्राधिकरणको केरौन १३२-३३ केभी सबस्टेशन आयोजनाले दुहबी–दमक १३२ केभी प्रसारण लाइनमा ‘लूप इन लूप आउट’ (एलआईएलओ) कार्य गर्ने तयारी गरेको छ । सोही कामका लागि प्रसारण लाइन बन्द गर्नुपर्ने भएकाले विद्युत् आपूर्ति प्रभावित हुने प्राधिकरणले जनाएको छ ।

प्राधिकरणका अनुसार २०८३ असोज १७ गते शनिबार बिहान ४ बजेदेखि दिउँसो १२ बजेसम्म पहिलो दिन विद्युत् सेवा बन्द हुनेछ । त्यसको भोलिपल्ट असोज १८ गते आइतबार पनि बिहान ४ बजेदेखि दिउँसो १२ बजेसम्म विद्युत् आपूर्ति रोकिनेछ ।

यसअनुसार दुई दिन बिहानको समयमा गरी दैनिक आठ घण्टा विद्युत् आपूर्ति बन्द हुनेछ। बिहानको समयमा विद्युत् सेवा अवरुद्ध हुँदा उद्योग, व्यापार, व्यवसाय, कार्यालय तथा घरायसी उपभोक्ताको नियमित कामसमेत प्रभावित हुन सक्नेछ ।

कुन–कुन क्षेत्र प्रभावित हुन्छन् ?
विद्युत् कटौतीको प्रभाव झापामा मात्रै सीमित रहने छैन । प्राधिकरणका अनुसार झापा, इलाम, पाँचथर र ताप्लेजुङ जिल्लाका सम्पूर्ण क्षेत्र प्रभावित हुनेछन् । त्यस्तै, मोरङ जिल्लाका उर्लाबारी, पथरी तथा आसपासका क्षेत्रमा समेत विद्युत् आपूर्ति बन्द हुनेछ ।

प्रसारण लाइनमा गरिने एलआईएलओ कार्यका क्रममा विद्युत् प्रणालीको संरचनामा आवश्यक जडान तथा व्यवस्थापनको काम गरिने भएकाले निर्धारित समयमा आपूर्ति बन्द गर्नुपर्ने प्राधिकरणको भनाइ छ ।

प्राधिकरणले तोकिएको समयभन्दा अगावै प्राविधिक काम सम्पन्न भएमा विद्युत् सेवा पनि निर्धारित समयभन्दा पहिले नै सञ्चालनमा ल्याउन सकिने जनाएको छ । दुई दिन लामो विद्युत् अवरोधका कारण उपभोक्तालाई पर्न सक्ने असुविधालाई ध्यानमा राख्दै प्राधिकरणले आवश्यक तयारी गर्न आग्रह गरेको छ। विद्युत् आपूर्ति बन्द हुने समयलाई मध्यनजर गर्दै उद्योग, व्यवसाय, कार्यालय, शैक्षिक संस्था तथा घरायसी उपभोक्ताले आफ्ना विद्युतीय उपकरण र दैनिक कार्य व्यवस्थापन गर्नुपर्ने देखिन्छ ।

प्राधिकरणले विद्युत् सेवा बन्द हुँदा पर्न जाने असुविधाप्रति क्षमायाचना गर्दै कार्य सम्पन्न गर्न आवश्यक सहयोग गरिदिन र धैर्यधारण गर्न सम्पूर्ण ग्राहकलाई अनुरोध गरेको छ । प्रसारण लाइनको काम सम्पन्न भएपछि सम्बन्धित क्षेत्रको विद्युत् आपूर्ति नियमित हुने प्राधिकरणले जनाएको छ ।