एजेन्सी । सन् २०३५ सम्ममा चीनको राजधानी बेइजिङ ‘अति वृद्ध’ जनसङ्ख्या भएको शहर बन्न सक्ने अनुमान सार्वजनिक भएको छ ।

अबकाे ९ वर्षमा बेइजिङकाे झन्डै एकतिहाइ जनसङ्ख्या ६० वर्ष वा त्योभन्दा माथिको उमेर समूहको हुने अपेक्षा गरेको ‘बेइजिङ डेली’ लाई उद्धृत गर्दै समाचार संस्था रोयटर्सले  जनाएको छ ।

सन् २०२५ को अन्त्यसम्ममा बेइजिङमा ६० वर्ष वा त्योभन्दा माथिका ५२ लाख ९० हजार स्थायी बासिन्दा थिए, यो सङ्ख्या त्यहाँको कुल जनसङ्ख्याको झन्डै एकचौथाइ हो ।

चिनियाँ नीति निर्माताहरूले जनसङ्ख्या योजनालाई देशको आर्थिक रणनीतिको एक मुख्य हिस्सा बनाएका छन् । सन् २०२६ मा जन्मदर बढाउनका लागि सरकारले झन्डै १८० अर्ब युआन अर्थात् झन्डै ४१ खर्ब रुपैयाँ बराबरको सम्भावित लागत व्यहोर्नुपर्ने अवस्था आउन सक्ने खबरमा उल्लेख छ ।

बेइजिङ सरकारले वृद्ध बासिन्दाहरूका लागि सहयोग बढाउँदै लगेको छ, यसमा आधारभूत निवृत्तिभरण (पेन्सन) मा वृद्धि गर्नु पनि समावेश छ ।

सन् २०२२ देखि चीनको जनसङ्ख्या घट्न थालेको छ र वृद्धको सङ्ख्या बढ्दै गइरहेको छ । यसले आन्तरिक उपभोग बढाउने तथा ऋण नियन्त्रण गर्ने सरकारी योजनाहरूलाई जटिल बनाइदिएको छ । पेन्सन बजेटमाथि पहिले नै ठूलो दबाव रहेको अवस्थामा अब करोडौँ मानिस श्रम बजारबाट बाहिरिने क्रममा छन् ।

आज बालबालिकाको सङ्ख्या कम हुनुको अर्थ भविष्यमा घरपरिवारको सङ्ख्या घट्ने र उपभोग वृद्धिको गति सुस्त हुन सक्ने जनसाङ्ख्यिकीविद् र अर्थशास्त्रीहरूले बताएका छन् ।