एजेन्सी । उरुग्वे समूह विजेताको रुपमा कोपा अमेरिका फुटबलको क्वाटरफाइनलमा प्रवेश गरेको छ ।

ब्राजिलमा जारी प्रतियोगिता अन्तर्गत मंगलबार बिहान भएको समूह सी अन्तर्गतको खेलमा साबिक विजेता चिलेलाई १–० ले हराउँदै उरुग्वे समूह विजेता बनेको हो । उरुग्वेको जितमा ८२ औँ मिनेटमा एडिन्सन काभानीले गरेको गोल नै निर्णायक बन्यो ।

सुरुमा दुई खेलमा जित निकालेको चिले समूह चरणको अन्तिम खेलमा भने पराजित भयो । उसको ६ अंक रह्यो र समूह उपविजेताका रुपमा अन्तिम ८ मा पुग्यो । दुई खेलमा जित र एकमा बराबरी गरेको उरुग्वेको सात अंक छ ।

चिलेले जापानलाई ४–० र इक्वेडरलाई २–१ ले पराजित गरेको थियो । यस्तै इक्वेडरलाई ४–० ले पराजित गरेको उरुग्वे जापानसँग भने २–२ को बराबरीमा रोकिएको थियो ।

समूह सी अन्तर्गत मंगलबार बिहानै भएको खेलमा जापान र इक्वेडरले १–१ को बराबरी खेलेका छन् । जापानका लागि १५ औँ मिनेटमा शोया नाकाजिमाले गोल गरे । ३५ औँ मिनेटमा इक्वेडरका लागि एन्जल मिनाले बराबरी गोल फर्काए । दुई अंकसहित जापान समूहको तेस्रो स्थानमा रह्यो ।