फाल्गुन १५, २०७७ शनिबार

झापा विद्रोहका योद्धा चौधरीलाई बिर्तामोड नगरपालिकाद्वारा घर हस्तान्तरण

बिर्तामोड । झापा विद्रोहका योद्धा टंकप्रसाद चौधरीलाई विर्तामोड नगरपालिकाले घर हस्तान्तरण गरेको छ । सरस्वती पुजाको अवसरमा नगरपालिकाले निर्माण गरिदिएको घर हस्तान्तरण पछि चौधरी परिवारलाई प्रवेश समेत गराइएको छ ।

न्याय र समानताको लागि तत्कालिन शासकको विरुद्धमा आवाज उठाउँदा चौधरीलाई धरपकड गरी ९ वर्ष ३ महिना जेल हालिएको थियो । साविक गरामनी–८ का चौधरी हालसम्म घरबार विहीन थिए । उनलाई घर निर्माणका लागि विर्तामोड नगरपालिकाले पहल गरेपछि बिर्तामोड–४ का विदुर तिवारीले जग्गा उपलब्ध गराएका थिए । उनै तिवारीले उपलब्ध गराएको जग्गामा बिर्तामोड नगरपालिकाले घर निर्माण गरेर प्रवेश समेत गराएको विर्तामोड नगरपालिकाका प्रशासन प्रमुख देवराज कार्कीले जानकारी दिए ।

झापा विद्रोहका योद्धा चौधरीका लागि सुरक्षित आवास निर्माण गर्न नगर प्रमुख धु्रव कुमार शिवाकोटीले नेतृत्व गरेका थिए । नगर प्रमुख शिवाकोटी र उपप्रमुख पवित्रा महतराले चौधरीलाई मंगलवार प्रवेश गराएका छन् ।

वर्षौदेखि भाडामा बस्दै आएको चौधरीको परिवारलाई घरसहित ओढ्ने ओच्छ्याउने कपडा, ग्यास चुलो, २ वटा खाट उपलब्ध गराइएको छ । साढे पाँच लाख लागतमा घर निर्माण सम्पन्न गरिएको योजना शाखा प्रमुख जय तिम्सिनाले बताए ।

प्रतिक्रिया दिनुहोस्

इजलास डटकम

बिर्तामोड,झापा
सम्पादक – प्रदीप परियार
दर्ता नम्बर : १६९६५४/७३/०७४
टाइम्स मिडिया नेटवर्क प्रालिद्वारा प्रकाशित ‘इजलास दैनिक’को आधिकारिक वेबसाइट