चैत्र १६, २०८० शुक्रबार

आजदेखि हल्दिवारी १ मा अनिश्चितकाल लकडाउन

हल्दिबारी । झापामा पहिलो पटक हल्दिबारी गाउँपालिका वडा नं. १ ले लकडाउनको घोषणा गरेको छ । कोरोना भाइरस संक्रमणको तेस्रो लहर शुरु भएपछि जिल्लामा हल्दिवारी १ बाहेकले लकडाउन गरेका छैनन् । संक्रमणको जोखिमलाई कम गर्न आजदेखि लागु हुने गरि अनिश्चितकालिन लकडाउन गरेको वडाध्यक्ष त्रिलोचन सापकोटाले जानकारी दिए ।

हल्दिबारी गाउँपालिका वडा नं. १ अन्तरगत कोरोना रोकथाम नियन्त्रण समितिसहितको सर्वदलीय बैठकले अर्को सूचना प्रकाशित नहुन्जेलसम्मका लागि लकडाउन घोषणा गरेको हो ।

गोलधाप बजारमा रहेको जनजागृति माध्यमिक विद्यालयका शिक्षकसहित स्थानीय २१ जनालाई कोरोना संक्रमण देखिएपछि हल्दिबारी गाउँपालिका– १ नम्बर वडा कार्यालयले आफ्नो भूगोलमा लकडाउन घोषणा गरेको वडाध्यक्ष त्रिलोचन सापकोटाले बताएका छन् ।
बुधबार गोलधाप स्वास्थ्य चौकीमा ६० जनाको स्वाब परीक्षण गर्दा १३ पुरुष र ८ महिला गरी २१ जनालाई कोरोना संक्रमण पुष्टि भएको थियो । त्यसमा जनजागृति माविका ६ जना शिक्षक पनि रहेका छन् ।

वडाध्यक्ष त्रिलोचन सापकोटाले जारी गरेको सूचनामा आजदेखि अत्यावश्यक कामबाहेक हिँडडुल गर्न रोक लगाउने, साप्ताहिक हाटबजार पूर्णरुपमा बन्द गर्ने, स्थानीय व्यवसाय तथा वित्तीय कारोबारहरू अनिवार्यरुपमा स्वास्थ्य मापदण्ड अपनाई सेवा प्रदान गर्ने, ओमिक्रोनको लक्षण हुने र सङ्क्रमितहरूको कन्ट्याक्ट ट्रेसिङमा पर्नेहरूले प्रत्येक हप्ताको शुक्रबार गोलधाप स्वास्थ्य चौकीमा गई एन्टीजेन परीक्षण गराउने उल्लेख छ ।

अनावश्यक हिंडडुल रोकेर आफ्नो वडाले ओगटेको भूगोललाई मात्र लकडाउन गर्दा पनि संक्रमण फैलनबाट रोक्न सहयोग पुग्ने भएकाले वडा अन्तरगतको कोरोना रोकथाम नियन्त्रण समितिको सिफरिसमा यस्तो निर्णय गर्नुपरेको वडाध्यक्ष सापकोटाले बताएका छन् ।

प्रकाशित मिति : माघ ७, २०७८ शुक्रबार  १० : १६ बजे

प्रतिक्रिया दिनुहोस्
लोकप्रिय
ताजा

इजलास मिडिया प्रा.लि द्वारा संचालित

कार्यालय सम्पर्क - बिर्तामोड ४,झापा
सूचना बिभाग दर्ता नं. : ३९९२- २०७९/०८०
सम्पर्क : ९८५२६४५०२८
ईमेल : [email protected]