आश्विन २०, २०७९ बिहीबार

बिर्तामोडमा सामुदायिक कुकुर बन्ध्याकरण शिविर सुरु

बिर्तामोड । बिर्तामोड नगरपालिकाले सामुदायिक कुकुर बन्ध्याकरण शिविर सुरु गरेको छ । पशुपंछी तथा मत्स्य विकास शाखाको आयोजनामा शनिबार देखि शिविर सुरु गरिएको हो ।

शिविरको नगरप्रमुख पवित्रा महतारा प्रसाईले व्यानर पढेर उद्घाटन गर्नुभयो । हिमालयन एनिमल रेस्क्यु ट्रस्ट (हार्ट) को प्राविधिक सहयोगमा सुरु गरिएको यो शिविर असोज ६ गतेसम्म सञ्चालन हुनेछ । नगरपालिकाले २०७२ सालदेखि हरेक वर्ष सामुदायिक कुकुर बन्ध्याकरण शिविरको आयोजना गर्दै आएको छ । यस पटक दुई सय ५० वटा कुकुरको बन्ध्याकरण गर्ने योजना रहेको पशुपंछी तथा मत्स्य विकास शाखाकी प्रमुख सावित्रा दाहालले जानकारी दिनुभयो ।

शिविर उद्घाटन कार्यक्रममा बोल्दै नगरप्रमुख प्रसाईले सामुदायिक कुकुरमा लागेको रेबिज रोगका कारण केहि समय अघि नगरका २,८ लगायत विभिन्न वडामा पशु चौपायमा क्षति पुगेको बताउनु भयो । उहाँले कुकुर बन्ध्याकरणका लागि प्राविधिक टिम बाहिरबाट नै मगाउनु पर्ने भएकाले धेरै सहज नभएपनि हरेक वर्ष यो शिविर सञ्चालन गर्दै आएको बताउनु भयो ।
कार्यक्रममा बोल्दै हार्ट नेपालका निर्देशक खगेश्वर शर्मा भट्टराईले सामुदायिक कुकुरको न्युनिकरण र रेविज उन्मुलनका लागि विश्वमा बन्ध्याकरण बाहेक अरु कुनै विधि नरहेको बताउनु भयो । उहाँले बिर्तामोडमा वर्षमा २ पटकसम्म वन्ध्याकरण शिविरको आयोजना गर्नुपर्ने आवश्यकता रहेको बताउनु भयो ।

नगरभित्र रहेका सामुदायिक कुकुरहरुको सर्वे गरेर तथ्याङ्क संकलन गर्ने योजना बनाईरहेको पशुपंछी तथा मत्स्य विकास शाखाले जनाएको छ । शिविर उद्घाटन कार्यक्रममा नगर उपप्रमुख नगेन्द्र प्रसाद संग्रौला, शिक्षा शाखा प्रमुख तिलचन भण्डारी, कृषि शाखा प्रमुख राजेन्द्र प्रसाद कडरिया, शाखा अधिकृत मेघराज बाँस्तोला लगायतको उपस्थिति रहेको थियो ।

प्रकाशित मिति : आश्विन १, २०७९ शनिबार  ५ : २१ बजे

प्रतिक्रिया दिनुहोस्

इजलास दैनिक

कार्यालय सम्पर्क - बिर्तामोड,झापा
सम्पादक – प्रदीप परियार
कम्पनी दर्ता नम्बर : १६९६५४/७३/०७४
विज्ञापनको लागि : ०२३–५३५०२८
सम्पर्क : ९८५२६३५०२८/९८५२६४५०२८
टाइम्स मिडिया नेटवर्क प्रा.लि. द्वारा प्रकाशित ‘इजलास दैनिक’को आधिकारिक वेबसाइट तपाईंको साझा इजलास