प्रधानमन्त्री ओली अस्पतालबाट डिस्चार्ज
काठमाडौं१४ कार्तिक – प्रधानमन्त्री ओली अस्पतालबाट डिस्चार्ज हुनुभएको छ । स्वास्थ्यस्थिति सामान्य रहेसँगै उहाँ डिस्चार्ज हुनुभएको हो ।
उहाँ धापासीस्थित ग्राण्डी अन्तर्राष्ट्रिय अस्पतालमा उपचाारर्थ बुधबार भर्ना हुनुभएको थियो । अस्पतालका मेडिकल डाइरेक्टर चक्रराज पाण्डेले बिहीबार पत्रकार सम्मेलन गरी प्रधानमन्त्रीको उपचारको क्रममा हेमोडायलाइसिस गरिएको जानकारी दिँदै अहिले स्वास्थ्य अवस्था सामान्य रहेकाले डिस्चार्ज गर्ने निर्णय गरिएको जानकारी दिनुभयो ।
अस्पताल स्रोतका अनुसार प्रधानमन्त्री ओलीको बिहीबार गरिएको डाईलासिस सफल भएको छ । बुधबार पनि प्रधानमन्त्री ओलीले ग्राण्डी अस्पतालमा पुगेर मृर्गौंलाको पहिलो डाइलासिस गराउनुभएको थियो ।
यसअघि प्रधानमन्त्रीको नियमित स्वास्थ्य जाँच त्रिवि शिक्षण अस्पताल परिसरको मनमोहन कार्डियो थेरासिस भासकुलर तथा ट्रान्सप्लान्ट सेन्टरमा हुँदै आएको थियो । बीचमा एक पटक ओली वीरेन्द्र सैनिक अस्पतालमा पनि स्वास्थ्य परीक्षणका लागि उहाँ पुग्नुभएको थियो ।
प्रधानमन्त्री ओलीको यसअघि सिंगापुरमा प्लाज्मा फेरोसिस गरिएको थियो । सिंगापुरमा ६ पटक प्लाज्मा फेरोसिस गरिएको थियो । सिंगापुरमा प्लाज्मा फेरोसिस गरेर ओलीको शरीरमा जम्मा भएको एन्टी बडी नष्ट गरेर उहाँ गत भदौ २० गते काठमाडौं फकिनुभएको थियो ।