‘बिर्तामोड नगर अस्पतालको सेवालाई थप प्रभावकारी बनाउछौं’
डा. सुनिल अधिकारी, मेसु
बिर्तामोड नगर अस्पतालका मेडिकल सुपरिडेन्डेन्ट डा.सुनिल अधिकारीले सेवा प्रवाहलाई प्रभावकारी बनाउदै जाने योजना रहेको बताएका छन् । उनले विगतमा भन्दा धेरै सुधार ल्याएको बताएका हुन् ।
उनका अनुसार एक वर्षमा ७६ हजार ५ सय ६९ जना विरामीलाई उपचार सेवा प्रदान गरिसकेको छ । अस्पतालमा सेवा लिने सेवाग्रहीको संख्या हरेक दिन बढ्दो क्रममा छ । सेवा विस्तारलाई तिब्रता दिइरहेको नगर अस्पतालले भर्खरै प्रथम वार्षिकोत्सव मनाएको छ । एक वर्षको सेवालाई समिक्षा गर्दा सन्तोषजनक रहेको उनको भनाई छ ।
सो क्रममा अस्पतालका मेडिकल सुपरिटेन्डेन्ट डा. सुनिल अधिकारीले दैनिक सेवाग्राहीको संख्या बृद्धि भइरहेकोमा खुशी व्यक्त गरेका थिए ।
नगर अस्पतालमा स्त्री तथा प्रसुति रोग, बालरोग विशेषज्ञ सेवा र मनोरोगको समेत सेवा उपलब्ध छ । २४ घण्टा बर्थिक सेन्टर सञ्चालन गरेको नगर अस्पतालमा ४० जनाको डेलिभरी सफल भइसकेको छ । आधारभूतदेखि शल्यक्रियासम्मका सेवा दिँदै आएको नगर अस्पतालमा सेवा प्रवाहलाई थप प्रभावकारी बनाउदै जाने मेसु अधिकारीको योजना छ ।
उनले इजरजेन्सी र वार्ड सञ्चालन गरेर थप सेवा प्रदान गर्न सकिने बताए । त्यसका लागि आवश्यक जनशक्ति व्यवस्थापन जरुरी भएको छ । १५ शैयाको नगर अस्पतालमा इमरजेन्सी सेवा र विरामी भर्ना गरेर राख्ने वार्ड मात्र थप गर्न सके नगरवासीलाई ठुलो उपलब्धी हासिल हुने थियो । डा. अधिकार भन्छन्, नगर अस्पतालको सेवा अहिलेसम्म ठिक छ । भावी दिनमा थप राम्रो बनाएर लैजान सकिन्छ ।
विशेष गरी नगर अस्पतालमा विरामीहरु धेरै समय लाइनमा बस्नु परेको गुनासो छ । विरामीहरुले लाइन व्यवस्थापन मिलाउन आग्रह गर्दै आएका छन् । त्यति मात्र होइन, नगरवासीले ल्याव र भिडियो एक्स–रे गर्ने समय अपुग भएको सूझाव दिएका छन् । अस्पताल आउने विरामीले समयको मापदण्डका कारण एक्सरे र ल्यावको लागि सजिलो हुनुपर्ने माग गर्दै आएका छन् । – बिर्तामोड सेरोफेरोमा प्रकाशित