सम्पादकीय
नेपाली फुटबलमा मोफसलको बलियो क्लवका रुपमा स्थापित झापा ११ फुटबल क्लब समग्र झापावासीको शान र पहिचानको प्रतिक हो । स्थापनाकालदेखि नै मैदानमा उत्कृष्ट प्रदर्शन र राष्ट्रिय लिगमा सशक्त खेल प्रदर्शन गर्न सफल झापा ११ ले हालै सम्पन्न ३८ औं विराट गोल्डकपको उपाधि विजेता बनेको छ । तीन दर्जन ट्रफी उठाउन सफल झापा ११ को खेल प्रदर्शनले जिल्लाको नामलाई संसारभर परिचित गराउन सफल भएको छ । विभिन्न वाधा अवरोधका बीच झापा ११ ले फुटवलप्रेमीहरुलाई खुशी दिएको छ । क्लव सञ्चालनका कयौं चुनौतिहरुका बीचमा पनि खेलाडीहरुले सबैको मन जितिरहेका छन् । क्लवले झापालाई फुटबलको उर्वर भूमिका रूपमा स्थापित गर्न मद्दत गरिरहेको छ ।

झापाको फुटवल क्लव भन्नासाथ झापा ११ सबैलाई स्मरण हुन्छ । खेलाडीहरुको मेहनतकै कारण झापा ११ यहाँसम्म आएको हो । खेलाडीहरुको मेहनत र जलकुमार गुरुङको अगुवाईले क्लव सफल बनिरहेको छ । यस क्लवलाई सधैं सफल बनाउन नदेखिएका धेरै पात्रहरुको योगदान पनि सम्मानजनक छ । झापा ११ ले उपाधि जितिरहेको छ । समर्थकहरुको मन जितिरहेको छ । तर, क्लवलाई आर्थिक रुपमा मजवुद बनाउन अपेक्षाकृत सहयोग भइरहेको छैन । झापा ११ झापालीहरुको साझा क्लव हो । झापाबासीको सम्पत्ति हो । यसको संरक्षण गर्ने दायित्व जलकुमार गुरुङहरुको मात्र होइन । सबैको साथ सहयोग हुन आवश्यक छ । झापालीको मान प्रतिष्ठा हो, झापा ११ । तर, खेलक्षेत्रका नाममा हुने राजनीतिले यो क्लव पनि मारमा परेको छ ।

क्लबलाई राष्ट्रिय र अन्तर्राष्ट्रिय स्तरमा सधैँ प्रतिस्पर्धी र व्यावसायिक बनाइराख्न खेलाडीको मेहनतले मात्र पुग्दैन । यसका लागि राज्य, निजी क्षेत्र र आम नागरिकको उत्तिकै साथ र सहयोग आवश्यक पर्दछ । झापा ११ सँग क्षमतावान् खेलाडीहरू छन् । यद्यपि, पर्याप्त भौतिक पूर्वाधार, दिगो आर्थिक स्रोत र वैज्ञानिक प्रशिक्षणको अभावमा क्लबले आफ्नो पूर्ण क्षमता प्रदर्शन गर्न चुनौती झेल्दै आएको छ । एउटा क्लब देशकै उत्कृष्ट बन्नका लागि त्यसको व्यवस्थापन व्यावसायिक हुन जरुरी छ । यसका लागि स्थानीय सरकारहरूले खेलकुद बजेटलाई आफ्नै पालिकामा मात्र सिमित बनाउन हुदैन । क्लबको दीर्घकालीन विकासका लागि बजेट व्यवस्थापनमा सहयोग गर्नैपर्छ । झापाका उद्यमी र व्यवसायीहरूले यस क्लबलाई ब्रान्डका रूपमा आत्मसात् गर्दै प्रायोजनमार्फत सहयोग पु¥याउनु आवश्यक छ । साथैं, झापा गोल्डकप र झापा ११ लाई एक बनाउन आवश्यक छ । गोल्डकपले झापा ११ सञ्चालनका लागि पूर्ण रुपमा सहयोग गर्न आवश्यक छ । समग्र जिल्लाको गौरवका रुपमा रहेको क्लबलाई देशकै नमूना र उत्कृष्ट बनाउन सबैको साथ जरुरी परेको छ ।