राजन घतानी

भाटभटेनी सुपर स्टोर सानो किराना पसलको रूपमा सन् १९८४ (वि.सं. २०४१) मा सुरु भएको हो । आज यसले २७ शाखा सञ्चालन गरिरहेको छ । २२ हजार भन्दा बढी नेपालीलाई रोजगारी दिएको छ । यहाँ सामान सधैं एमआरपी भन्दा सस्तो पाइन्छ, छुट तथा विभिन्न अफर हुन्छन् । पोइन्ट सिस्टमले परिवारलाई खर्च बचत गर्न ठूलो मद्दत गरेको छ ।
तर २०८२ साल (२०२५ ए.डी.) को जेन जी आन्दोलनमा ठूलो दुर्घटना भयो । विरोधको नाममा धेरै भाटभटेनी शाखाहरूमा आगजनी र लुटपाट भयो । त्यो पनि दशैं जस्तो सबैभन्दा ठूलो पर्वको पूर्वसन्ध्यामा ।

रोजगारी र सपना खरानी
सो घटनापछि हजारौं कर्मचारी एक्कासी बेरोजगार भए । जसले दशैंमा घरमा खुसी लैजानुपर्ने थियो, उनीहरूको सपना, पसिना र भविष्य आगोमा खरानी बन्यो ।

आन्दोलन कि लुटपाट ?
आन्दोलन गर्नु सबै नागरिकको अधिकार हो । प्रणाली, भ्रष्टाचार र सरकारले गरेका गलत निर्णयप्रति आक्रोश हुनु स्वाभाविक हो । तर निजी व्यवसाय, जसमा लाखौं परिवारको जीवन निर्भर छ, त्यस्ता ठाउँमा आगजनी गर्नु समाधान होइन ।

यदि वस्तु नै चाहिएको थियो भने पनि कम्तीमा संरचना जोगाउन सकिन्थ्यो । पसल बाँकी रहँदा फेरि छिट्टै सञ्चालन गर्न सकिन्थ्यो । तर सम्पत्ति नै जलाउँदा काम, रोजगारी र सेवा सबै गुमेको छ ।

किन भाटभटेनी महत्वपूर्ण छ ?
२२,००० भन्दा बढीलाई रोजगारी दिएको छ ।
नेपालकै सबैभन्दा ठूलो करदातामध्ये एक ।
मध्यमवर्गीय परिवारलाई सस्तोमा किनमेल गर्ने सुविधा दिएको छ ।
छुट र पोइन्ट सिस्टमले खर्च कम गरेको छ ।

ग्राहकको पीडा
म आफैं नियमित रूपमा भाटभटेनीमा किनमेल गर्न जान्थेँ । हरेक पटक नयाँ सामान, छुट र अफर पाइन्थ्यो । पोइन्ट संकलन गरेर महिनैभरको घरेलु सामान सजिलै किन्न सकिन्थ्यो । आज ती उज्यालो पसलहरू खरानीमा बदलिएको देख्दा मन अत्यन्तै दुख्छ ।

अब के गर्ने ?
सरकारले र कम्पनीले रोजगारी गुमाएका कर्मचारीलाई सहयोग र राहत दिनुपर्छ ।
पसलहरू चाँडै पुनःनिर्माण गरेर सञ्चालनमा ल्याउनुपर्छ ।
भविष्यमा आन्दोलन शान्तिपूर्ण हुनुपर्छ, जनताको जीवन र रोजगारीलाई क्षति पु¥याउने गरी होइन ।

निष्कर्ष
भाटभटेनी केवल सुपरमार्केट मात्र होइन, नेपालकै आर्थिक प्रगतिसँग जोडिएको नाम हो । यसलाई जलाउँदा हजारौं परिवार प्रभावित भए । न्याय र परिवर्तन चाहिन्छ, तर यो कहिल्यै पनि जनताको रोजगारी र सपनाको मूल्यमा हुनु हुँदैन ।