बिर्तामोड । नेकपा एमालेका स्थायी कमिटी सदस्य शेरधन राईले संवैधानिक मार्गबाट मात्रै मुलुक अघि बढ्न सक्ने बताएका छन् । नेकपा एमाले झापाको सातौं पूर्ण बैठकलाई सम्बोधन गर्दै उनले संसद पुनस्र्थापना गरेर ताजा जनादेशमा जानुपर्ने बताए ।

झापाको बिर्तामोडमा आयोजित बैठकमा नेता राईले एमाले निर्वाचनबाट नभाग्ने स्पष्ट पारेका छन् । अहिलेको सरकारले निर्वाचनका लागि दलहरुको विश्वास जित्नुपर्छ, उनले भने – यो सरकार दलहरुलाई टाढा राखेर गैरसंवैधानिक हिसावले अघि बढ्दैछ । यसरी निर्वाचन संभव छैन । फागुन २१ को मिति जनताको आँखामा छारो हाल्ने काम मात्रै हो ।

कोशी प्रदेशका प्रथम मुख्यमन्त्री राईले एमाले मुलुकको रक्षाका लागि आन्दोलन र संघर्षका गर्न सधैं तयार रहेको स्पष्ट पारेका छन् । उनले आगामी दिनमा देशको रक्षाका लागि एमालेजनहरुलाई तयारी अवस्थामा बस्न आग्रह समेत गरे ।
बैठकलाई सम्बोधन गर्दै नेता राईले एमाले र यसका नेताहरुले पनि कमजोरीमाथि समीक्षा गर्दै सच्चिएर अघि बढ्नुपर्ने धारणा राखे । अहिले एमालेको नेतृत्वमाथि मुख्य प्रहार भइरहेको बेला नेतृत्व परिवर्तनको सवाल अस्वभाविक हुने बताएका छन् ।

कोशी प्रदेश इञ्चार्ज राईले २०४६ सालपछि लाभका पदमा पुगेका सबै नेता कार्यकर्ताको सम्पत्ति विवरण सार्वजनिक गरेर छानविनका लागि एमाले तयार रहेको बताए । ‘हामी एमालेका नेता कार्यकर्ताले अनियमितता गरेका छैनौं’, इञ्चार्ज राईले भने, ‘हामीले सरकार बनाए पनि २०४६ सालको आन्दोलनपछि राज्यका अरु अंगको पुनर्संरचना गर्न नसक्ता अहिलेको समस्या आएको हो ।’

यस्तै, स्थायी कमिटी सदस्य हिक्मत कार्कीले जेनजी आन्दोलनमा भएका घटनाहरुको निष्पक्ष न्यायिक छानविन गनुपर्ने बताएका छन् । उनले भदौं २३ र २४ गतेको घटनाको छानविनबाट सरकार भाग्न नमिल्ने बताए । उनले समृद्ध राष्ट्र निर्माणका लागि एमालेलाई निर्णायक शक्तिको रुपमा स्थापित गर्नुपर्ने धारणा राखेका छन् । राष्ट्रिय शक्ति निर्माण गर्न पार्टीमा मजवदु एकता कायल गरेर जानुपर्ने उनको धारणा थियो ।

बैठकमा कोशी प्रदेश कमिटी सचिव राजकुमार भण्डारीलगायतले सम्बोधन गरेका थिए ।

पार्टीका झापा जिल्ला अध्यक्ष प्रेम गिरीले जेनजी आन्दोलनका क्रममा पार्टीको केन्द्रीय, प्रदेश, नगर, वडालगायतका नेता कार्यकर्ताहरूको घरमा आगजनी, भौतिक सम्पति लुटपाट, तोडफोडलगायतको विवरण प्रस्तुत गरेका छन् ।

झापामा ४० जनाभन्दा धेरै नेता कार्यकर्ताको घर तोडफोड, आगजनी, लुटपाट तथा भौतिक क्षति पुर्याइएको जानकारी गराइएको छ ।
अध्यक्ष गिरीले घटनाको निष्पक्ष न्यायिक छानविन गरी कारबाही हुनुपर्ने माग गरेका छन् । उनले आगजनी, तोडफोड गर्नेहरु विरुद्ध जाहेरी दिने बताएका छन् ।