अर्जुनधारा । झापाको अर्जुनधारा नगरपालिका–३ मा रहेको साना किसान कृषि सहकारी संस्था लिमिटेड खुदुनावारीले ४० प्रतिशत अनुदानमा आधुनिक तान्ने फलामको हलो वितरण गर्ने भएको छ ।

खेती लगाउँदा लागत कम लाग्ने, श्रम र समयको बचत, उत्पादनमा बृद्धि गर्न सकिने भएकाले सो उपकरण वितरण गर्न तयारी गरिएको संस्थाका मुख्य प्रबन्धक गोपिकृष्ण लुइटेलले जानकारी दिए । उनले मुख्यगरी आलु, सीवि, राजमा, मकै लगायत तरकारी बालीका लागि बहुउपयोगी रहेको लुइटेलले बताए ।

संस्थाको २४ औं साधारणसभाबाट पारित निर्णय अनुसार किसानलाई व्यावसायिक कृषि खेतीमा आकर्षित गर्न ४० प्रतिशत संस्थाको अनुदान र ६० प्रतिशत समूहको लगानी रहने छ । फलामको हलो वितरण गर्न तयारी स्वरुप कार्यालयमा उपलब्ध भइसकेको र चाँडै शेयर सदस्यको माग अनुसार एक समूह एक हलो उपलब्ध गराइने संस्थाका अध्यक्ष कृष्ण प्रसाद दंगालले जानकारी दिए । उनले आधुनिक उपकरणले कृषकको जीवनस्तरमा धेरै सहजता ल्याउने विश्वास व्यक्त गरेका छन् ।